Ez zen posible izan, Inaxio Perurenak beste egunen batean lortu beharko du 300 kiloko harria jasotzea. Asteasun, jaso bai, baina behin harria bizkarreratutakoan, berdindu eta bizkarrean eutsi behar izaten zaio, eta norberak, inork ukitu gabe, bota. Inaxiok harria jaso zuen, baina berdintzeko garaian bizkar atzetik ihes egin zion, eta lurrera erori eta bi puskatan apurtu zen.

Susto aurpegi galanta geratu zitzaien Asteasuko pilotalekuan batu ziren zaleei, baina ez zen ezer gertatu, harriak inor ez zuen ukitu, eta Inaxio berak ere pausoa aurrera eman, eta ez zuen kalterik izan, denon zorionerako.

Leitzarrak marka bat egiteko garaian lehen aldiz anaia izan zuen alboan. Orain artekoetan aita izan du ondoan beti, baina oraingoan anaiarekin joateko hautua egin zuen. 202koari bi jasoaldi eta 255ekoari bat eman ostean, prest agertu zen marka egiteko. Harria ongi ekarri zuen gerrira, han buelta eman, eta bular parean arazoren bat edo beste izan bazuen ere, ederki bultza egin zion gora, eta marka balekoa izango zela zirudienean, harriak ihes egin zion, eta lurrean geratu zen bi puska eginda.

«Kolpe handia eman diot»

Amaieran Inaxio triste zegoen marka lortu ez zuelako, baina gustura ere bai, ezer gertatu ez zitzaiolako: «Garbi dago marka bat lortzen ez denean ezin zarela gustura egon, baina ikusi dut jasotzeko gai naizela. Gero gertatu dena gertatuta, inork minik ez hartzea izan da garrantzitsuena beste guztiaren gainetik», esan zuen leitzar gazteak.

Gertatutakoa honela argitu zuen: «Harria ongi ekarri dut gerrira, eta buelta ere ongi eman diot. Gero apur bat okertu zait, baina lortu dut nahi nuen lekuan jartzea. Gero, ezin duzu kontrolatu, dudan guztiarekin eman diot harria bizkarrean berdintzeko, baina gehiegizkoa izan da, eta ihes egin dit. Tamaina honetako harriekin kontrolatzea zaila da, eta garbi dago nik amaieran gehiegizko kolpea eman diodala», aitortu zuen.

Orain garbi dauka aurrera egin behar duela: «Ez da lehen aldiz marka egitera joan, eta lehenengoan lortu ez dudana, eta besteek ere huts egiten dute. Harri handiak dira hauek, eta hutsegiteak garesti ordaintzen dira. Orain, hau ahaztu egin behar da ahalik eta azkarren, eta lanean jarraitu behar dut, hurrengo marka ahaleginean harria berdindu ahal izateko», esan zuen.