Eskualde edo Erregioetako Kontseiluak berritzeko hauteskunde kanpaina abiatu zen atzo. Alta, alderdi gehienek ez dute irekiera ofiziala itxaron, ahalik eta boz gehien eskuratzeko zereginei heltzeko. Bai Estatuan, bai Ipar Euskal Herrian, aspalditik dabiltza kanpaina lanetan murgilduta.

Lapurdi, Nafarroa Behere eta Zuberoako boto-emaileek, Akitanian aurkeztu diren hamaika zerrenden aukera izango dute, baina, gainerako lurraldeekin alderatuta, kanpaina desberdina izango da. Bi gai nagusitu dira aurrekanpainako eztabaida politikoan -AHT burdinbide berriaren proiektua eta Ipar Euskal Herrirako aitortze instituzionalaren eskaera- eta, zalantzarik gabe, eragin handia izango dute emaitzetan.

Inkestek asmatzen badute, Alain Rousset (PS) irabazle suertatuko litzateke lehen itzulian, baina, hori bai, hirugarrengoz Akitaniako Kontseilua gidatzeko, aliantzak egin beharko lituzke. Eta hor, Ipar Euskal Herrian pil-pilean dagoen AHTren gaiak kontraesan bat baino gehiago sortuko du, batik bat, Europe Ecologie Aquitaineko hautagaitzari.

Hautagaiak erregioaren arazo eta premietan zentratzen saiatzen badira ere, zailtasun handiak dituzte beren mezuak helarazteko. Izan ere, 2004an gertatu moduan, orain ere estatu-kutsua gailentzen ari da nabarmen, eta Gobernuan dagoen alderdiaren eta oposizioaren arteko norgehiagoka bilakatzen ari da kanpaina.

Zigor-botoaren indarra

Alde batetik, Eskualdeko Kontseilua erakunde ezezaguna da herritarrentzat. Gehiengo zabalak aitortzen du ez dakiela nor den bere erregioko presidentea, ezta zer eginkizun duen kontseilu horrek ere.

Bestetik, duela sei urte bezala, Sarkozy presidentearen eta gobernuaren politika «zigortzeko» parada eskainiko diete hauteskundeok herritarrei. Orduan Raffarinen gobernua egiten ari zen erreformen ondorioak ez zituela onartzen adierazi zuten argiki hautesleek eta, bi izan ezik (Korsika eta Altsazia), Estatuko erregio guztiak sozialisten esku geratu ziren.

Egun, antzeko zerbait gertatzen ari da. Sarkozyren erreforma andanari eta, batez ere, zerbitzu publikoan egiten ari den murrizpenei, krisiari aurre egiteko neurriak erantsi zaizkie azken hilabeteotan eta, litekeena da oso, martxoaren 14an eta 21ean «zehapen botoa» asko indartzea.

Hori dela eta, badirudi PSri aurreikusten zitzaion beherakada ez dela hain gaitza izango. Inkestek, bederen, hori diote oraingoz, baita Akitanian ere. Uste guztien aurka, gainera, Europe Ecologiek (EA barne duen zerrenda) ez lituzke Europako bozetan erdietsitako emaitza onak eskuratuko eta laugarren geratuko litzateke UMP eta Modemeko zentristen atzetik.