Gola egitea Osasunari izugarri kostatzen ari zaion arren, Jose Antonio Camachok oso argi izan du beti Pandiani eta Aranda bere aurrelari titularrak direla. Gola sartzea taldearen gabezia nagusia den arren, jokatzeko moduan izan dituenean, Murtziakoak beti jarri du bere konfiantza osoa uruguaitarrarengan eta andaluziarrarengan, baina ez bata, ez bestea ez daude bihar Racingen kontra jokatzeko moduan eta honek aukera berriak aztertzera eraman du gorritxoen entrenatzailea.

Printzipioz, bi aukera eskaintzen zizkion aulkiak, harrobiko Jorge Galan gaztea eta Dady, eta azken bi entrenamenduetan ikusitakoaren arabera, Cabo Verdekoa izango da kantabriarren aurka hasieratik jokatuko duena.

Savo Milosevicek taldea utzi zuenetik, Osasunako aurrelariek nolabaiteko zorigaitza dutela ematen du, agian Pandianiren salbuespenarekin, serbiarraren ondoren egindako proba guztiek porrot egin baitute. Dadyren kasua ere halakoxea da, Os Belenensesi 3,5 milioi euro ordainduta Osasunaren historiako fitxaketarik garestiena izan zen arren, afrikarraren ekarpena ez da uste bezain ona izan.

Zigandaren aginduetara, bere lehen denboraldia izan zen Dadyren onena, arazo muskularrak tarteko, taldean sartzea kostatu zitzaion arren, hemeretzi partidetan titular izanda, zazpi gol egin baitzituen.

Hortik aurrera, ordea, gauzak oso bestelakoak izan dira. Arazo fisikoak ugaritu baino ez dira egin eta honek edozein jokalarik beharrezkoa duen jarraikortasuna eten zion.

Gainera, jokalaria ez du oso gustuko Camachok, eta osasunez ondo egon denean ere ez du ia apenas aukerarik eduki. Kopan izan ditu Dadyk bere minuturik gehienak, eta Xerezen aurkako kanporaketan bi gol ere egin zituen. Ligan, ordea, Athleticen aurkako derbian baino ez da titular aritu eta ez du golik sartu.

Galanentzat kolpea

Azken jardunaldietako deialdietatik ere sarri geratu da at Dady eta honek nolabaiteko abantaila ematen zion Jorge Galan gazteari, baina badirudi harrobiko gazteak aulkitik hasi beharko duela berriro.

Bigarren taldearekin makina bat gol sartu ostean, aurrelari nafarrak lehen taldean tartetxo bat egitea lortu zuen, are gehiago Valladoliden garaipenaren gola sartu zuenean. Gauzak aldrebestu zitzaizkion, ordea, neguko fitxaketa merkatuan. Osasunak hitzartua zuen Huelvako Recreativorekin Adrian Colungarekin truke bat egiteko akordioa, baina Jorge Galanek ez zuen talde gorritxoa utzi nahi izan, Camachok ez zuen nahi zuen aurrelaria lortu eta Galanek apenas izan du minuturik.