Gauza ugari ditu gaur gauean jokoan Real Unionek Gal Stadiumean. Aurrean izango duen taldea, Cadiz, aurkari zuzena du sailkapenari erreparatuta. Andaluziarrak hiru puntura daude, baina irundarrek irabaziz gero, aurretik jartzeaz gain, Bigarren Mailan mantentzeko beharrezkoa den tokira gerturatzea erdietsiko dute.

Hiru puntuez gain, ohorea dago jokoan Irunen. Galen neurtuko diren bi taldeak aurten igotakoak dira, eta elkarren kontra aritu ziren Bigarren Mailarako kanporaketan. Ordukoan, andaluziarrek lortu zuten garaipena, eta Unionek beste bi neurketa jokatu behar izan zituen Alcorconen aurka, orain dagoen kategorian egoteko. Beraz, jaso zuten «kaltea» itzultzen saiatuko dira talde zuri-beltzeko jokalariak.

Bi aurrelarirekin

Argi dago Real Unioni irabaztea dezente kostatzen zaiola. Horregatik, etxean jokatzen duela ikusita, Gal inoiz baino infernuago bihurtu behar du gaur. Zelaia betetzea espero da, eta horrek indarra eman beharko lieke jokalariei denboraldia amaitzeko falta diren hamahiru neurketa hauetan azken hatsa emateko.

Iñaki Alonsok bi aurrelari ipin ditzake. Gorka Brit lasartearrarekin batera, Goikoetxea edo Maric aritu daitezke hain garrantzitsuak eta beharrezkoak diren golak sartzen laguntzeko.