Taiwanek eta Txinak merkataritza arloko hitzarmen historikoa sinatu zuten atzo. Hala, 60 urtez banandurik egon diren uhartearen eta kontinentearen arteko harreman ekonomikoak berreskuratu dituzte. Erlazio politikoa ere berrabiaraz daiteke, Taiwanen neurri horren kontra daudenen haserrerako.

Chongqinen (Txinako hegomendebaldeko metropolian) sinaturiko Elkarlan Ekonomikorako Hitzarmenak (ACCE) merkataritza arloan aukera handiak eskaintzen ditu, eta azken bi urteotan Txina eta Formosa ohiaren hurbilketak emandako emaitza da. Txinako nazionalistek Formosan lortu zuten aterpea 1949an komunistek herrialde osoan garaipena eskuratu zutenean.

«Hitzarmen honek garai berri bat irekitzen du bi aldeen arteko harreman ekonomikoetan. Horrez gain, aurrerapausoa da bientzat eskualdeko integrazio ekonomikoa eta mundializazioaren joera orokorrean», adierazi zuen Taiwaneko negoziatzaile buru Txiang Pin-kungek.

Akordioak merkataritzaz eta aduanako zergez baino ez du hitz egiten, baina Taiwanen oposizioko kideetako batzuek akordio hau arlo politikoan, bi herrialdeak berriz batzeko bidean, urrats arriskutsua izango den beldur dira.

«Honek uhartea kontinentera hurbil dezake. Taipei ekonomikoki menpekoagoa den heinean aukera politiko gutxiago ditu», adierazi zuen Taipeiko Sootxow Unibertsitateko zientzia politikoetako aditu Iang Iung-mingek.

Joan den larunbatean, hamarka mila lagun manifestatu ziren Taipeiko kaleetan akordioaren aurka, Alderdi Demokratiko Aurrerakoiaren (independentziaren aldekoa) deialdiari jarraituz, «Taiwan salbatu» lelopean.