Ostegunean Montargisen barruan zeraman korapilo sendoa askatu zuen arte, Tourreko esprintak infernu bat ziren iaz sei garaipen lortu zituen Mark Cavendishentzat. Petacchik irabazi zuen lehenengoan, Brughart alemaniarra lurrera bota zuen. Hushovdek irabazi zuen esprintean, berriz, beste askok bezala, kaosaren erdian amaitu zuen. Lampreko italiarrak bigarren garaipena eskuratu eta pelotoiko azkarrena zela zirudienean, azkarregi amore eman zuen, garaipenak ezinezkoa zirudiela aditzera emanaz. Osteguneko garaipenak, ordea, piztia piztu du: Man uharteko txirrindulariak gainean zeraman zama bide bazterrean utzi du eta irribarrea bere aurpegira itzuli da. Esprintak gozagarri zaizkio berriz, eta, bera ondo egonda, aurtengo Tourrean ez dago aurre egingo dionik.

Izan ere, ostegunean bezala, aurkariak gurpiletik atera zituen Man uhartekoak azken metroetan Gueugnonen, Mark Renshaw taldekideak egindako lana bikain borobilduz. Oscar Freire beteranoak esana da -atzo ez zuen esprinta lehiatu- Columbiak ez duela garai bateko kontrol lanik egiten etapa amaieretan, eta egia da George Hincapieren hutsunea handia izan daitekeela eta Michel Rogers eta Tony Martinek sailkapen orokorra dutela buruan; aldiz, momentuz nahikoa du Cavendishek Zeelanda Berriko Mark Renshaw taldekidearekin. Atzokoan Garmin taldea izan zen azken kilometroetan Tyler Farrarrentzat kontrol lana egin zuena, baina, une erabakigarrian, Columbiakoak ez zion inolako aukerarik eman estatubatuarrari. Hala ere, eskumuturrean hartutako kolpetik osatzen ari dela dirudi eta atzo bigarren amaitu zuen.

Atzokoarekin, hamabi dira jada Man uharteko txirrindulariak Tourrean lortutako garaipenak: 2008an lau, iaz sei eta aurten, momentuz, bi. Britainiarrak 25 urte dituela kontuan izanda, marka guztiak hauts ditzake. Oraingoz, Erik Zabel bere aholkulariaren eta Mario Cipolliniren marka berdindu du.

Ruben Perezen ahalegina

Gainontzean, aurtengo Tourreko etaparik luzeena nahikoa lasaia izan zen pelotoiarentzat, egunero bezala ihesaldi saiakerak izan baziren ere. Montargis eta Gueugnon arteko 227,5 kilometroek laugarren mailako lau menditxo zituzten, eta, bezperako etapan gertatu bezala, ia hasieratik saiatu ziren ausartenak pelotoiak baimenduko zuen ihesaldiaren bila.

Tour hasiera honetan ia egunero gertatu bezala, Euskalteleko txirrindulari bat tartean zen, atzoko kasuan Ruben Perez bizkaitarra. Mathieu Perget (Caisse d'Epargne) eta Lang (Omega Pharma-Lotto) lagun zituela, zazpi minututako aldea izatera heldu zen euskalduna, baina esprinterren taldeek bikain kalkulatu zuten lanean noiz jarri. Behin ihesaldia harrapatu ostean, Charteau (Bouygues) eta Champion (Ag2r) ere saiatu ziren. Hori bai, alper-alperrik.