Asko eta asko dira urtero, jaietan, Baionara hurbiltzen direnak. Euskal Herritik, baina, bereziki Estatu frantsesetik jiten dira gehienak. Jendetza horren aitzinean, jaien berezitasuna mantentzea «ezinbestekoa» da Jean Marc Landarretxe Ibialde elkarteko lehendakariaren iritziko. Dantzazpi, Baionan Kantuz eta beste hainbat ekitaldi sustatzen ditu elkarteak, eta gaur egun, arratsaldero euskal dantza eta kantuei tarte berezi bat ematen dion Karrikaldi ekitaldiaren antolatzailea da.

Azken urteotan Baionako jaiek izandako arrakasta kultura ezberdinen nahasketarekin lotu zuen. «Horrek egiten ditu bestak berezi. Hori galtzen bada, bestak desagertzera kondenatuak dira. Baionara hurbiltzen diren bestazaleen kopurua handitzen bada, behar da, horrekin, bestetan proposatzen diren animazioen kalitatea handitu, eta hori egiteko kulturaren sustapena osagai ezinbestekoa da», nabarmendu zuen Landarretxek. Alde horretatik, jaietan parte hartzen dutenek festak aberastu behar dituztela nabarmendu zuen. «Bestetara ez gara kontsumitzera etorri, baizik eta horiek aberastera», gehitu zuen. Landarretxen esanetan, bakoitzak badu horretan zer egitekorik, eta horretan, karriketan azken egunetan ibilki dabilen Peña Ibiltariaren ekimena txalotu zuen. Festen arrakastan belaunaldien arteko nahasketak ere zerikusi handia duela adierazi zuen. «Duela zenbait urte belaunaldiak ez ziren elkartzen, eta horrek ondorio txarrak izan ditu, bai gazte bai helduentzat», bukatu zuen. Belaunaldi nahasketa inoiz baino azkartuago ikusi zen Baionan atzo.