Pakistango agintariek atzo emandako datuen arabera, montzoiek ekarritako euriteek azken lau egunotan 800 hildako eragin dituzte, eta beste 200en bat desagertutzat eman dituzte.

Kyber Paktunkhwa Pakistango ipar-mendebaldeko probintzian inoiz ez dituzte ezagutu hain uholde kaltegarriak, Express telebista kateari bertako Exekutiboko iturriek esan diotenez. Yasir Hayat Kyber Paktunkhwako Hondamendien Kudeaketarako arduradunak Efe berri agentziari adierazi dionez, oraindik hildako gehiago zenbatu beharko dituzte.

NBE Nazio Batuen Erakundeak egin dituen kalkuluen arabera, milioi bat pertsona inguru kaltetu dituzte aurtengo uholdeek, eta horietako ehunka zaurituta daude; gainera, medikuen laguntza berehala jasotzeko aukera handirik ez dute. NBEk jakinarazi du Kabul eta Swat ibaiak beren bidetik atera direla, baita probintzia menditsuko zubi gehienak erabat suntsituta daudela ere. Beraz, biktimen kalterako, erreskate eta laguntza taldeen lana mantsotu egingo da.

Helikopteroak eta itsasontziak

Armadak zuzentzen ditu salbamendu ahaleginak. Atzo 30 helikoptero zituen lan hori egiteko, eta gaur beste sei izango ditu bere eskura. 150 itsasontzi ere badituzte militarrek kaltetuei laguntza eman ahal izateko. Erreskate taldeek 15.000 pertsona atera zituzten ostiralean arrisku handiko lekutatik, Amer Siddique Hondamendien Kudeaketarako operazio zuzendariak jakinarazi duenez.

Kaxmirren ere sekulako kalteak eragin dituzte uholdeek. Eskualdetik Txina aldera doan errepide nagusia suntsituta geratu da, eta inguru menditsu horietako makina bat herrixka erabat isolaturik daude. Uholdeekin batera, lur jauziak ere oso arriskutsuak izaten ari dira.

Uraren mailak gora egin zuen atzo Peshawar, Nowshera eta Charsada eskualdeetan, eta agintariek uste zuten kaltetutakoen kopuruak oraindik ere gora egin dezakeela. Swat, Peshawar eta Shanglara joaterik ez zegoen, eta Txinara doan Karakoram izeneko autopista bera ere itxi egin behar izan zuten.