CASTRES 25

AVIRON 16

Amaitu da Avironen ametsa, lehen porrota jaso baitute. Halere, espero zitekeen hala gertatzea, Liga irabazteko hautagai baten zelaian jokatzen baitzuten atzo.

Dena dela, euskaldunek oso lan ona egin zuten, batez ere lehen zatian. Markagailuan aitzinetik aritu ziren, eta atsedenera ere 9-16 joan ziren aurretik, baina bigarren zatian gauzak erabat aldatu ziren, eta oso txarrerako, gainera.

Oso azkar aurreratu ziren zuri-urdinak, eta oren laurdena betetzerako 0-10 aurretik ziren markagailuan. Hortik aurrera jokoa kontrolpean izan zuten erabat, eta Castresek zigorren bidez bakarrik lortu ahal izan zituen bederatzi puntuak. Ordura arte ikusitakoak itxaropenerako ateak zabalik mantentzen zituen, baina bigarren zatian gauzak erabat aldatu ziren.

Etxeko taldea erasokor atera zen, eta Aviron erabat menperatu zuen. Ez zion eman inongo aukerarik, eta euskaldunak esku-hutsik itzuli ziren. Galdu arren, ordea, oso itxura ona eman zuten, batez ere lehen zatian.

Zaleak ere itxaropentsu egoteko moduan dira, izan ere, lehen jardunaldi hauetan taldeak baikor izateko arrazoi guztiak eman baititu. Dena dela, ez da ahaztu behar, lehen helburua mailari eustea izan behar dela.

Biarritzek galdu

Biarritzek berriro ere kolpea hartu zuen. Orain arte puntu bakar bat ere lortu ez duen talde baten zelaian, Agenen, jokatu zuen, eta 28-23 galdu zuen. Puntu gehigarria lortu zuen, baina puntu horrek nahiko gustu txarra utziko zion.

Baja batzuk izan zituen Jean Michel Gonzalezen taldeak, eta nabarmenena Yachvilirena izan zen. Jaurtitzailearen hutsunea asko nabarmendu zen euskaldunen artean, ostikoekin nahiko kaskar aritu baitziren. Biarritzek iazkoaren tankerako hasiera izan du. Hiru jardunaldi jokatu, eta garaipen bakarra erdietsi du, eta horietako bi etxean jokatuta, gainera. Ligan goiko muturrean ibili nahi duen talde batentzat, oso zenbaki kaskarrak direla ezingo du inork ukatu.

Zigorren bidez heldu zen lehen entsegua, eta Aiestaran gazteak lortu zuen bestea. Boschek eta Barraquek gauzatu zituzten bi entseguak. Gero, Boschek bi zigor lortu zituen eta Barraquek, berriz, bat egin zuen.

Hamabostekoa honako hau izan zen: Bosch (Barraque, 63.min), Ngwenya, Bond, Trainer, Haylett Petty, Balsahw, Lesgourgues (Aiestaran, 48.min), Lakaffia (M.Lund, 64.min), Harinordoki, Lauret, M.Lund, Thion, Jhonstone (Coetzee, 45.min), Terrain (August, 41.min) eta Marconet.