Irailaren 17a, Zinemaldiaren abiatze eguna, gerturatzen ari den heinean, jaialdiaren antolatzaileek 58. edizioaren inguruko xehetasunak ezagutarazten ari dira. Azken berria, Zinemira Euskal Zinemaren Panorama sailari dagokionaren ingurukoa izan da. Iaz jaiotako sailak, aurten Euskal Herrian ekoitzi diren lanik esanguratsuenen panoramika eskainiko du bigarrenez, eta, edizio honetan, ez fikziozko zinemak berebiziko garrantzia izango du. Zinemaldiko zuzendari Mikel Olacireguik eta Lakuako Kultura sailburuorde Antonio Riverak aurkeztu zituzten atzo Donostian «begirada ezberdinez jositako» atalaren barrunbeak.

Zinemira zortzi filmen erakusleiho izango da, eta horietatik bost erabateko estreinaldiak izango dira gainera. Txaber Larreategik eta Josu Martinezek parte hartze bikoitza izango dute aurtengoan, Zinemiran aurkeztuko baitituzte, batetik, «Debekatuta dago oroitzea» -36ko Gerran Saturraranen izan zen emakumeen espetxeari buruzko dokumentala- eta, bestetik, «Sagarren denbora» -Kristiane Etxaluz zuberotarraren eta Alfonso Etxegarai Afrikako irla txiki batean erbesteratuta dagoen bizkaitarraren arteko harremanari buruzko dokumentala hori ere-. Bi estreinaldi horiez gain, oraindik inon erakutsi ez diren lanen artean daude «Amerikanuak» (Nacho Reig) -Nevadako (AEB) Elko herrira joandako zenbait immigrante euskaldunen historiari buruzko dokumentala-; «Musika Plaza» (Juan Miguel Gutierrez) - amiantoaren aferaren inguruko ekoizpena-; eta «Ttaup, ttaup! Arraun kolpeka» (Eneko Dorronsoro) -Zumaiako hamahiru arraunlariren bizipen eta kezkak biltzen dituena, neguko prestaketa gogorren denboraldian-.

Bost film horiez gain, Zinemirak «80 egunean», Jon Garaño eta Joxe Mari Goenagaren lehenengo lan luzea, Fernando Bernues eta Mireia Gabilondok zuzendutako «Mugaldekoak» filma (EITBrentzat telesail gisa ere sortua), eta «Simplemente», Jon Anduezak Down sindromea duten gazteen inguruan egindako dokumentala, ikusaraziko ditu.

Film luzeen erakusleiho izateaz gain, Zinemirak ekoizpen laburretan Euskal Herrian egindako ekarpenak ere azaleratuko ditu. Hala, Kimuak 2010 katalogorako hautatu diren lanetako batzuk ikusi ahal izango dira, nahiz eta emanaldiak sektoreko profesionalentzat bakarrik zuzenduak izango diren.

Zinemira saria, bigarrenez

Euskal zinemari eskainitako sail horren egunik garrantzitsuena, ordea, irailaren 22ak emango du, Victoria Eugenia antzokian egingo den Euskal Zinemaren Galarekin. Bertan, Txaber Larreategik eta Josu Martinezek zuzendutako «Debekatuta dago oroitzea» filma estreinatzeaz gain, bigarrenez, Zinemira saria banatuko da. Iaz, Imanol Uriberi egokitu zitzaion omenaldia, aurten Alex Angulo aktore bizkaitarrak jasoko du, euskal zinemagintzan duen garrantziagatik eta bertan egindako ibilbidea nabarmentze aldera. Alex Angulok (Erandio, 1953), 1971n hasi zuen bere ibilbidea antzezle gisa Bilboko Comics de la Legua antzerki talde independentearekin. 1980an, Karraka taldean sartu zen. Zineman egin zuen lehen lana «Segoviako ihesa» (1981) izan zen, 2009ko Zinemira saridun Imanol Uribek zuzendutakoa. Alex de la Iglesia bilbotarrarekin «El dia de la bestia» egin zuen 1995ean eta, lan horri esker, aktore onenaren Goya sarirako izendapena jaso zuen. Antzerkian eta zineman egindako lanez gain, «Periodistas» telesailean parte hartu izanak ospe handia eman zion erandiotarrari. Aurtengoan, Sail Ofizialean Oscar Aibar zuzendariaren «El Gran Vazquez» filma aurkeztuko du.

Olacireguiren aburuz, Zinemirak «herri honetan egiten den zinemari maitasunezko begirada eskaintzen dio». «Euskal zinemari sail bat eskaintzea beharrezko konpromisoa da Zinemaldiarentzat eta, era berean, gure ekoizpenerako elkargune izan behar du», adierazi zuen. Zuzendariaren irudiko, «azken urteetan zinema espainolari buruz hitz egin izan da, baina euskal zineman kalitate handiko ekoizpenak egiten dira eta berebiziko garrantzia du bere aldeko apustua egiteak».

Zinemiran ikusaraziko diren egitasmoez gain, Zinemaldiko gainerako sailetan ere euskal zinemak emango du zer esana. Zabaltegin, esaterako, Mikel Rueda zuzendari gazteak Saturrarango espetxeari buruz filmatutako «Izarren Argia» film luzea estreinatuko da eta, Sail Ofizialean, Jose Maria de Orberen lana, «Aita», Astigarragan filmatua.