GARA > Idatzia > Kultura

ZINEMALDIA

«Dustin Hoffmanek zure antzezpenean gauza ezberdinak ateratzea lortzen du»

Zahartzarora iristean bizitzan zehar egindakoaz oroitzea aski arrunta izaten da. Horixe da, hain zuzen, «Barney's version» film kanadarra hasteko erabilitako aitzakia. Eleberri baten moldaketa lan honen aurkezpenean, Paul Giamatti eta Rosamund Pike, filmeko bi protagonistak, izan ziren Donostiako Kursaalen.

Maddalen LARRINAGA | DONOSTIA

Drama eta komedia nahasten dira Richard J. Lewis zuzendari kanadarraren «Barney's version» filmean. Bere bigarren film honetan Paul Giamatti («Sideways», 2004), Rosamund Pike («The Libertine», 2005) eta Dustin Hoffman («Kramer vs.Kramer», 1979; «Rain Man», 1988) aktoreek hartzen dute parte.

Barney Panofsky (Paul Giamatti) itxuraz arrunta da, baina ezohiko bizitza du: alde batetik, bere lehenengo emaztea agertzen da, Clara, izaki librea eta desleiala. Ile gorriko emakume honekin denbora labur batez biziko da Barney Erroman. Bigarren emaztea, P. andrea, printzesa judu izugarri aberatsa da, erosketak egiten eta gelditu gabe hizketan ematen du denbora, Barneyk entzuten ez duela konturatu gabe.

Bigarren ezkontzaren ospakizunean bertan, Barney beste emakume batekin maiteminduko da, Miriam (Rosamund Pike), hirugarren emaztea, bere bi seme-alaben ama eta Barneyri benetako maitasuna biziaraziko diona. Bere abenturetan aita, Izzy (Dustin Hoffman), lagun izanda, Barneyk bere bizitza luze eta koloretsuko une on eta txarretan zehar eramango du ikuslea.

Richard J. Lewisen bigarren pelikula da hau; hala ere, telebistan bederatzi urtez egin du lan «Alfred Hitchcock Presents» edo «CSI» telesail ezagunen ekoizle, gidoilari eta errealizadore gisa. «Barney's Version» Zinemaldiko Zabaltegiko Perlak sailean aurkeztu du, eta Veneziako Sail Ofizialean eta Torontoko zinema jaialdian ere hartu du parte lanak.

Alzheimerrak jota

Aurtengo Zinemaldian hiru filmetan ageri da alzheimerra: «Addicted to Love» lanean, «Bicicleta, cullera, poma»-n eta honakoan. Hala ere, «Barney´s version» filmean, Giamattik berak azaldu zuenez, ez zen nahi gaixotasuna filmeko gai nagusi izatea. «Izugarri gustatu zitzaidan filmean jasotzen duen fintasuna», azaldu zuen aktoreak, eta bizipen gogor horiek antzeztu ahal izateko, haren amona batek pairatutako momentuak gogoratu zituen: «Amonak bizi izandakoa ezagutu nuen, eta horrek lagundu zidan Barneyren kasua barneratzen».

Dustin Hoffman eskarmentu handiko aktorea da eta berarekin lan egitea berezia dela azaldu zuten Paul Giamatti eta Rosamund Pike aktoreek. Izan ere, Hoffmanek libreki antzezten du filmean zehar, «ez du gidoia zuzenki jarraitzen eta, horregatik, ez du esaldi berbera bi aldiz errepikatzen», zioen ekoizleetako batek. Gainera, Giamatti haren semea da pelikulan eta erlazio hori interpretatu ahal izateko, Hoffmanen eta bere semearen arteko erlazioa hartu zuen oinarritzat. Izan ere, Barney-ren semea Dustin Hoffmanen beraren semea da. Beraz, ez zuen oso urruti beharrezko eredua: «Bere semearekin zuen portaera aztertu nuen eta hori antzeratu nuen gure erlazioan». Gainera, Hoffmanen lan tresna inprobisazioa denez, bere lana ere izugarri erraztu zuela adierazi zuen Giamattik, «zure antzezpenean gauza ezberdinak ateratzea lortzen du».

Filmak Barneyren bizitza kontatzen duenez, adin aldaketa ugari ikus daitezke filmean zehar, izan ere, Barneyk, zahartzarora iritsia denak, gazte garaian bizitakoak ekartzen ditu gogora, eta atzera begiratze horiek egitea zahartzaroa baino zailagoa dela azaldu zuen protagonistak: «Atzera egitea zailagoa da. Izan ere, Barney askeagoa eta naturalagoa da zahartzen doan heinean», azaldu zuen Giamattik.

Filmak Mordecai Richlerrek (1931/01/27 - 2001/07/03 ) 2000. urtean idatzi zuen eleberrian du jatorria. Gainera, idazleak berak egin zuen filmaren lehenengo gidoia. Gero baina, behin betikoa amaitu baino lehen hil zen. Idazketa lan horietan murgilduta zegoela, eleberriko kokalekuetako bat aldatzea erabaki zuen, Parisen ordez, Erroma hautatu zuen Barneyren hasierako bizipenak erakusteko. Aldaketa hori nobelak Italian izandako arrakasta gatik egin zuen; izan ere, idazleak berak behin azaldu zuenez, Kanadan idazle soila zen, Italian, ordea, «rock izarra».

Imprimatu 
Gehitu artikuloa: Delicious Zabaldu
Igo