Operazioa gertatu zenetik luze itxaron ondoren eta behin epaiketa igarota, gaur eguerdian ezagutuko dute Udalbiltza kasuko auzipetuek Javier Gomez Bermudez Auzitegi Nazionaleko epailearen erabakia. Sententzia nola ezagutuko duten ziur ez badakite ere, Bilbon bilduko dira eguerdian abokatuen bulegoetan. Litekeena da posta elektronikoz jasotzea erabakiaren berri. Edonola ere, arratsaldean hedabideen aurrean egingo dute auzipetuek jasotakoaren gaineko balorazioa.

Udalbiltza sortu zenetik 12 urtera, beraz, ezagutzear dago Euskal Herrian sortu den lehen erakunde nazionalaren inguruko erabakia. Izan ere, hemeretzi alkate, zinegotzi eta langile ohien kontrako hamarna urteko kartzela zigor eskariaz gain, Fiskaltzak Udalbiltza-Kursaal deitu duten erakundearen, Udalbiltza Partzuergoaren -erakundearen zereginak gauzatu ahal izateko hainbat udalerriren artean sorturiko partzuergo publikoa- eta Euskal Garapen eta Kohesio Funtsaren behin betiko ixtea eta desegitea eskatu zuen epaiketaren azken saioan.

Azken urteotan auzitan izan den Udalbiltza Euskal Herriak izan duen lehen instituzio nazionala izan da. Zehazki, 1.778 udal hautetsik, gehienak EAJ- koak, EHkoak, EAkoak, ABkoak eta independenteak, Bilboko Euskalduna Jauregian aho batez hala erabakita jaio zen 1999ko irailaren 18an. Euskal Herriaren naziotasuna aldarrikatzea, zazpi lurraldeetako Euskal Herriaren egituraketa politikoaren eraikitzeari laguntza ematea, nazio eraikuntza bultzatzea, udalerri guztien harremanak hobetzea eta nazioartean Euskal Herria nazio berezko eta desberdindu gisa erakustea ziren biltzar hartan zehaztutako bost helburuak, 2001ean Kursaalen egindako biltzarrean berretsi ziren berberak. Lehen egitasmoak martxan jarrita, 2000ko udan izan zen EAJko eta EAko hautetsiek Biltzar Nagusia sine die atzeratzea erabaki zutenekoa, baina irailean EHko eta ABko hautetsiak aurka agertu eta 2001eko otsailean egin zen Kursaalen hainbat jatorri politikoetako 700 hautetsiren arteko bilera.

Gauzak horrela, jarritako helburuen gainean lanean hastea erabaki eta hori posible izan zedin Udalbiltza Partzuergoa sortu zuten; Zuberoa Garatzen ekimena jarri zuten martxan, «Euskal Herriaren Eskubideen Karta», Herrien Eskubideen Aldeko Nazioarteko Konferentzia eta Euskal Herriko Naziotasun Aitormenarekin batera.

2003ko udaberrian, bestalde, hauteskundeen gertutasuna zela-eta ezohiko biltzarra egin zuten Tolosan. Biltzarrean ezker abertzalearen hautagai zerrenden legez kanporatzeko prozesuak izan ziren aztergai. Hiru egun geroago, apirilaren 29ko goizaldean, Polizia espainolak, Baltasar Garzon epailearen aginduz, Udalbiltzak Astigarragan, Iruñean eta Bilbon zituen egoitzak itxi eta Udalbiltzako zortzi hautetsi eta langile atxilotu zituen.