Estibalitz EZKERRA Literatur kritikaria

Sarrera hitzak

Egunkari honetan nire lehen zutabea izango denari ekitear nintzela, zera pentsatu dut, baliteke irakurleetako askok ni nor naizen ez jakitea. Burutapen horrek gauez besteren etxean sartzen den lapurraren antzera sentiarazi nau. Iruditu zait, beraz, gauzak behar diren moduan haste aldera neure burua aurkeztu beharko nukeela lehenik. Hona hemen, bada, nire curriculuma. Kazetaritzan eta Artearen Historian lizentziaduna naiz Euskal Herriko Unibertsitatean. Ingeles Literaturako masterra lortu nuen iaz Nevadako Unibertsitatean, Renon (AEB), eta Literatura Konparatuan doktoregoa lortzeko bidean naiz orain. Hiru hizkuntzatan bizi naiz; haietako bi, euskara eta gaztelera, ama hizkuntza ditut. Hirugarrena, ingelesa, «aita hizkuntza» dudala esan daiteke. Hain zuzen, ingelesarekin dudan harremana txikitan aitak, gidatzen ari zela, entzuten zuen musikarekin (The Beatles, Dire Straits, Alan Parson Project, Led Zeppelin, Creedence Clearwater Revival…) hasi zen. Gogora datorkidan haurtzaroko eszena oro aitaren musikak girotuta egon ohi da. Eskolan derrigorrezko irakasgaia izatea ere erabakiorra izan zen ingelesa, eta ez frantsesa, nire hirugarren hizkuntza bihurtzeko orduan. Nire lankide estatubatuarrek pribilegiatu bat naizela uste dute, hiru hizkuntzen/kulturen artean nabigatzeko gai naizelako. Haietako askoren tragedia da hizkuntza bakarra menperatzen dutela. Hizkuntza bakarra duenak konpromiso eta borondate handia behar du besteren sentsibilitateetara gerturatu ahal izateko. Literaturaren munduan gabiltzanontzat, konpromiso eta borondate hori ez da aukera bat, baizik eta beharra.