Hiru urtez kantagintzatik aldenduta ibili ondoren, Erramun Martikorena euskal kantuaren mundura itzuli da «Gure lurretik» diskoa kaleratuz. «Ez nuen uste itzuliko nintzenik, baina, hazia berpiztu zait», argitu zuen.

Tiradera batean aspalditik zituen testu zahar batzuk hartu, eta negua igaro du abestiak moldatzen eta diskoa lantzen. Martikorenaren bederatzigarren diskoa da «Gure lurretik», eta bere esanetan, aurretik egindakoekin alderatuz «ezberdina da». Kantari baigorriarrak bere familiak bizitako historia aipatzen du hamabost kantu berri horietan. Eta, horri esker Ipar Euskal Herrian izandako gertakari garrantzitsuak agerian jartzen ditu. «Garrantzitsua iruditzen zitzaidan duela ehun urte idatziak izan diren bertso horiek agertzea, gure aitzinekoek pasatutako istorio garrantzitsuak aipatzen baitituzte».

Beste kantariekin lanean

Abestien sailkapenean hari zehatz bati jarraitu diola esan zuen Martikorenak. Euskal Herriaren «nortasunaren oinarrietariko» bat den hizkuntzari buruzko «Bizi dadin euskara» abestiarekin hasten da. Ondoko abestietan, Ameriketara joandako euskaldunak, Lehen Mundu Gerla, maitasuna, sufrimendua, familiari atxikimendua, artzaingoa, edo ezkontza aipatzen ditu. 1835. eta 1914. urteen artean Ameriketara joan ziren gazteetariko bat izan zen Erramun Martikorenaren aitatxi. 1912an itzuli bezain laster, Lehen Mundu Gerra egitea deitua izan zen, eta lau urte igaro zituen bertan.

Kantari baigorriarrak bost abesti moldatu ditu, eta, diskoa kaleratzeko hainbat musikari eta kantarirekin elkarlanean aritu da. Baigorriko Kantiruki abesbatza, Mikel Markez, Jean-Michel Bedaxagar edo Mixel Ducau izan ditu lagun, besteak beste.