«Gaurko prentsa agerraldian oso garbiak eta oso zuzenak izango gara». Honakoak izan ziren atzo Donostiako alkate Juan Karlos Izagirrek esandako aurreneko hitzak. Loiolako Erriberako geltoki intermodalaren egitasmoa gaitzat hartuta, horren aldeko apustua berretsi zuen alkateak. Izan ere, egitasmo horrek, Atotxakoak ez bezala, «intermodalitatea bermatzen du», argudiatu zuen. Horrez gain, «Udalari xantaia» egiten aritzea leporatu zien PSEri eta bereziki Ernesto Gascori, Udaleko PSEko bozeramaile eta Lakuako Garraio sailburuordeari.

Donostiako alkateaz gain, Jon Albizu Mugikortasun zinegotziak eta Ricardo Burutaran Hirigintza zinegotziak ere parte hartu zuten prentsaurrekoan. Izagirre zorrotz mintzatu zen Gascoren aurka, «egunkariak politikoki» erabiliz eta «filtrazioen bidez», Donostiako Udalak Metroaren aldeko jarrera hartuz gero, Loiolako geltoki intermodala egiteko inongo arazorik ez legokeela esan zuelako prentsan. Izagirrek azaldu zuenez, Gascok iragarritakoaren arabera, «aurkakoa bada, Euskal Trenbide Sareak ez omen du aldageltokirik egingo Erriberan».

Ondorioz, eta «Metroaren truke dena posible bada», PSEren argudioak «banaka-banaka baliogabetzen» direla iritzi zion alkateak. Era berean, Donostiak Metroaren gainean «inolako eskumenik» ez duela azaldu zuen; eta beraz, momentu honetan «arazo bakarra» PSE eta Ernesto Gasco bera direla salatu zuen.

Atotxari dagokionez, Udal Gobernuak ez ezik, Gipuzkoako Aldundiak jasotako dokumentuetan ere, Atotxako proiektua «ezbaian» jarri dela azaldu zuen alkateak. Besteak beste, txiki gelditzen dela, «sekulako inbertsioa» eskatzen duela eta «autobus operadoreek ere ez dutela nahi» aipatu zituen.

Hauteskunde garaia

Estatu espainoleko Sustapen Ministerioaren eskumenekoa den Adif-ek, trenbide azpiegituren administratzaileak lehiaketa abiarazi du, Atotxako geltokia AHTren etorrerara egokituz birmoldatzeko proiektuak idazteko. Horren harira, «hauteskunde kanpainan» gaudela gogorarazi zuen Izagirrek, eta «ideien» lehiaketa hutsa besterik ez dela izango esan zuen.

Ondorioz, «kerik ez saltzeko» eskatu zion PSEri, ohartaraziz igandetik aurrera, Estatuan parlamentu eta gobernu berriak osatuko direla, eta gobernu horren eta hautetsi horien eskumena izango dela erabakiak hartzea. Izagirrek «zentzuzkoagoak» eta «praktikoagoak» izango direlako iritzia azaldu zuen.