Albaniako legedia tradizionalari deritzo Kanun, eta herritar ororen ekintzak, berdin du katolikoak ala musulmanak diren, arautzen ditu. XV. mendean Lekë Dukagjini printzeak kode itxura eman zion ahoz aho komunikatua izandako arau multzoari, baina haren idatzizko forma ez zen hemeretzigarren mendera arte heldu. Guztira, 1.262 artikulu biltzen ditu Kanunak, eta mendiko bizimoduaren alderdi oro jorratzen du: etxeko ekonomiaren antolaketa, abegitasuna, anaitasuna, klana, mugak, lana, ezkontza, lurrak, eta abar. Besa (ohorea) giltzarri da kodean, hark gidatzen dituelako norbanakoaren jarrera zein gizarte harremanak. Kanun aipatzen denean, baina, arau jakin bat gogoan izan ohi da: odol gatazken nondik norakoak azaltzen dituena. Odol gatazkek inplikaturiko bi familietako gizon guztiak hilak diren arte iraun dezakete.