Abenduaren 6an hasi eta 9an itxiko ditu ateak aurten 47. edizioa izango duen Durangoko Azokak. 253 stand jarriko dituzte bertan 127 parte hartzailek, eta horietatik 15 teknologia arlokoak izango dira.

Krisialdiak eta BEZaren igoerak aurtengo edizioan eraginik izan duten arren, 400 nobedade, 300 ekitaldi inguru eta inoizko egitaraurik zabalena dakar Durangoko Azokak.

Aurten, herri jitoari dagokio kultura gonbidatu izatea eta Benito Lertxundik, ia edizio guztietan presente egon denak, jasoko du Azokak ematen duen Argizaiola saria.

Elkarte publikoen laguntza ez ezik, neurri guztietako enpresek zein komertzioek ere diruz laguntzen dute Gerediaga Elkarteak antolatzen duen -presidente Nerea Mujikaren esanetan- «euskal kulturaren erakusleihoa».

Elkarlana

Nerea Mujika bera izan zen, hainbat kazetari eta erakunde publikoren aurrean, 47. edizio hau aurkezteko prentsaurrekoan berba egin zuen lehena. Aurreko urte guztietan bezala, Azoka gauzatzeko ezinbestekoa izan den elkarlana aurten ere ardatz izango dutela nabarmendu zuen.

Horrela, Lakuak, Bizkaiko Aldundiak, Durangoko Udalak eta babesle handiek emandako laguntza eskertzeaz gain, komertzio eta enpresa txikiek zein hornitzaileek emandakoa ere gogora ekarri zuen. Azken horiei esker lortu da, besteak beste, «aurrekontua ahalik eta handiena» izatea, Mujikak aitortu zuenez.

Azken garai hauetan, Durangoko Azokak eskuartean izan dituen hausnarketa prozesuez ere mintzatu zen Nerea Mujika. Azken 47 urteotan, mundua eta Azoka aldatu diren arren, «moldatzen» jakin izan dutela esan zuen eta abian diren plan estrategikoak direla horren isla. Horrela da posible «euskal kulturaren erakusleiho» den Durangoko Azoka gorpuztea.

Zuzendari berria

Aiert Goenaga (Ondarroa, 1981) Durangoko Azokako zuzendari berriaren hitzetan, euskaldun batek nekez aurki lezake Azoka zuzentzea baino «erronka erakargarriagorik».

Lantaldeak koordinatzeko ardura dauka Goenagak eta egungo Azokak dituen bi helburu nagusiak aipatu zituen: gune berriei egonkortasuna ematea (aurten Plateruena izango da horietako bat lehen aldiz) eta transmisioa lantzea.

Urratsez urrats izandako bilakaerak Durangoko Azokaren izaera irekia eta parte-hartzailea erakusten du. Azken pausoa iaz eman zen, diziplina berriei eskainitako Irudienea (ikus-entzunezkoak), Szenatokia (arte eszenikoak) eta K@bia (teknologia eta adierazpen berriak) guneekin. Pauso horri jarraipena emango diote aurten eta, gainontzeko guneekin batera, espazio berri horiek finkatzeko ahalegina egin dute.

Stand eta nobedade gutxiago

«Krisialdiak ez du sorkuntzan eraginik izan», esan zuen Goenagak beste arloetan izan duela onartu aurretik. Izan ere, partaide eta nobedade nahikotxo egon arren, iaz baino gutxiago dira; gutxiago, eskaera ere horrelakoa izan baita.

411 lan berri argitaratu dira: 289 liburu, 65 bideo, 32 aldizkari, 7 liburu elektroniko eta bestelako 18 lan. Liburuetan egon da beherakada txikia, iaz 313 izan baitziren izenburu berriak. Gainontzeko produktuetan eutsi egin zaio ala gainditu egin da iazko kopurua (iaz 434 guztira).

Partaidetzari dagokionez, 127 argitaletxe, diskoetxe, talde, elkarte eta erakunde izango dira Azokan. Iazkoetatik 9 ez dira etorriko, baina 8 eskari berri onartu dira.

Standa jartzea gero eta garestiagoa dela-eta, hainbat elkarte txiki kexu dira. Aiert Goenagak honako azalpena eman zuen horren gainean: «BEZaren igoerak ia 100 eurotan garestitu du prezioa. Orduan, alde horretatik, arrazoia dute prezioak goraka joan direlako. Hala ere, kontuan hartu behar ditugu beste hainbeste elementu, horien artean, zoritxarrez, BEZa: 13 puntu horiek min handia egiten baitute».

Enpresa zein elkarte handien interesen eta txikiek dituztenen arteko orekari eustea zaila ote den galdetuta, horra zuzendariaren erantzuna: «Kasu batzuetan bai eta beste batzuetan ez. Badira guztiek komunean dituzten interesak eta nik uste horretan zentratu behar dugula: interes komun horiek zeintzuk diren ikusi eta horiek lantzen eta zaintzen joan. Eta, gero, norbanako kasuetan bestelako irtenbide pertsonalizatuak aurkitu. Dena dela, geuk ez diogu inori lehentasunik ematen txikia edota handia izateagatik. Helburu komunak zeintzuk diren, hau erakargarria egin. Kalitatezko eskaintza zelan lortu eta zelako lana egin behar dugun denon artean, helburu horiek lortzeko, zer egin behar dugun, hori da gure ardura».

Herri ijitoa

Aurtengo edizioan ijitoen kultura dugu kultura gondidatua. «Saiatu gara kultura ijitoak presentzia homogeneoa izaten Durangoko Azokako gune guztietan», esan zuen Goenagak. Horrela, esaten dutena praktikan jarri nahi dutela adierazi zuen.

Bertan izan ziren Kale Dor Kayiko-ko -euskal ijitoen elkartea- ordezkariak, Tio Manuel Vizarraga (Bilbo, 1945) elkarteko presidentea buru zutela. «Hunkituta nago, gure ametsetako bat honaino heltzea baitzen», esan zuen Vizarragak. «Duela urte batzuk gure burua zertzat genuen galdetu ziguten telebista kate batean semeari eta bioi: euskaldun, ijito eta kristautzat dugula esan genuen».

Erromintxela, euskal ijitoen hizkera berezia presente egongo da Azokan, eta hainbat ekitaldi izango dira horren inguruan.

Bestalde, Benito Lertxundik, bigarren edizioan Ez Dok Amairu taldearekin egon zena, jasoko du aurtengo Argizaiola saria.