Martxoaren 23 Mugimenduak (M23) Kongoko Errepublika Demokratikoko presidente Joseph Kabilaren hitzaz ez dela fidatzen adierazi zuen atzo. «Ez gara Kabilaren elkarrizketa proposamenaz fidatzen. Hiru hilabete eman ditugu Kampalan -Ugandako hiriburuan- elkarrizketaren zain», esan zuen M23 taldearen presidente Jean-Marie Runiga apezpikuak.

Alde horretatik, gerrillariak Gomatik ez direla aterako nabarmendu zuen. Hain zuzen, asteartetik dute euren kontrolpean iparraldeko Kibu eskualdeko hiriburua. Atzo, egoera lasaia zen hirian; dendak zabaldu zituzten atzera eta jendea zebilen kalean. Thomas MACO institutuko irakasleak azaldu zuenez, ia ez ziren M23 gerrillariak ikusten eta segurtasun osoa antzematen zen hirian.

Goman zaurituta zeuden Armadako 80 soldadu hiriko ospitale militarrean «zoriaren esku abandonatu» zituztela ohartarazi zuen, bestalde, Nazio Batuen Erakundearen Okapi irrati emanaldiak. «Hilik dauden hamarka soldaduen gorpuak kaleetan botata daude, bereziki, Katindo auzoan», jakinarazi zuen.

Gomatik 30 bat kilometrora, Sake herria ere mendean hartu zuten asteazkenean. Atzo, M23 eta segurtasun indarren arteko liskarretatik ihesi, milaka lagunek utzi zuten herria oinez, buru gainean maleta eta koltxoiak zeramatzatela. Lekukoen esanetan, mortero hotsak eta bi leherketa entzun ziren eta zenbait lekutan kea ikus zitekeen. Gerrillariz betetako kamioiak iritsi ziren Sakera.

Gauzak horrela, asteazkenean, Kabila Ruandako presidente Paul Kagamere eta Ugandako presidente Yoweri Musevenirekin bildu zen Kampalan. Gomatik ateratzeko eta beraien erasoaldia bertan behera uzteko deia egin zioten M23 taldeari.

Runigak, ordea, argi utzi zuen «negoziazio prozesurik ezean», ez direla Gomatik aterako. «Beharrezkoa dugu gizartearekin, diasporarekin, oposizioarekin eta Gobernuarekin negoziazio mahai bat eratzea kongoar guztien arazoez eztabidatu ahal izateko», eman zuen aditzera.

«M23 taldearen aldarrikapenak, Kongok pairatzen duen demokrazia gabezia, gobernatzeko arazoak eta giza eskubideen egoera aztertu behar ditugu», adierazi zuen Runigak.

Ugandako presidente Musevenik hala eskatuta, Runiga, Gomako hotel batean agerraldia egin ostean, Kampalara joan zen atzo berarekin elkarrizketatzera.

Laku Handien Gaineko Nazioarteko Goi Bilera deitu dute biharko, eta Kongoko Errepublika Demokratikoaren egoera aztertuko dute bertan, besteren artean, Kabilak eta Kagamek.

Bestetik, NBEk Monusco misioak ez duela M23 taldearekin zerikusirik argitu zuen adierazpen batean eta Kongoko Armadari laguntzen jarraituko duela esan zuen. Gomako aireportua NBEren indarren esku dago. Felix Bass koronelak esan zuenez, azpiegitura horren kontrola eskuratzen saiatu dira gerrillariak.