Ipar Euskal Herriko musika, Donostian
·«Iparraldea bertan!» izenburuko programa ospatuko da martxoan zehar Koldo Mitxelenan
DONOSTIA
“Iparraldea bertan!” izenburupean, hainbat ekitaldi antolatu dituzte Donostiako Koldo Mitxelena kulturunean martxorako. Ipar Euskal Herriko musika kantaldia eta hitzaldi bat izango dira datozen egunetan, guztiak 19.30ean. Mixel Etxekoparrek eta François Rossek emandako kontzertuekin hasi zen atzo egitaraua.
Martxoaren 16an, berriz, “Ene guduak” hitzaldia egingo da. Pierres Xarriton ariko da hizlari lanetan. Ideia berriak ekarri ditu eta haien alde borrokatu izan da urteetan.
Martxoaren 23an, Pil-Pil taldearen emanaldia ikusi ahal izango da. Alexandre, Bernadette eta Jojo Bordebaray ariko dira kantuan, eta Mixel Thikoipe eta Philipe Albor, berriz, gitarrarekin. Egitasmoa amaitzeko, martxoaren 30ean beste kantaldi bat izango da. Oraingoan, Dominica eta Niko Etxart aita-semeak ariko dira kantuan. Aitak kanturako zaletasuna igorri zion. Nikok rock-and-roll doinuak jo ditu gehienbat.
|
