Neska-laguntzat nahi zuen gaztea bortxatzen saiatu da Bilbon
BILBO
Ertzaintzak joan den asteartean 26 urteko gizon bat atxilotu zuen ustez emakume bati eraso eta bortxatzen saiatzeagatik. Lehenago, emakume horri bere neskalaguna izateko eskatua zion, Polizia iturrien arabera.
Lakuako Barne Sailak agertu duenez, erasoa joan den irailaren 5ean gertatu zen. Goiz hartan, erasotzailea biktimak lagun batekin partekatzen duen etxebizitzara joan zen, eta berarekin harreman sexualak izan zitzan estutu zuen. Indarrez logela batera eraman eta emakumea kolpatu eta eranzten saiatu zen. Biktimaren oihuak entzun eta hura laguntzera bertaratu zen pisukidea. Memento hartan, erasotzaileak ahalegina bertan behera utzi eta korrika alde egin zuen etxebizitzatik. Biktimak salaketa jarri zuen Ertzaintzaren polizia etxean, eta ikerketa baten ostean, joan den asteartean atxilotu zuten gizona.
|
