DONOSTIA

Esneko bildotsa da Aixuri, eta Europako araudiak animalia ekologikoentzat zehazten dituen baldintzak betetzen ditu, Enrike Gisasola artzainak jakinarazi zuenez. «Lurra da ekoizpenaren mugatzaile nagusia eta, beraz, daukagun azaleraren arabera ekoitzi beharra dugu. Ezinbestekoak ditugu instalazio egokiak ere, animaliak eroso bizi daitezen, eta ez dugu tratamendu sistematikorik eta prebentiborik erabiltzen. Tratamenduak egiten ditugu, baina albaitarien kontrolpean beti. Larrea da abereen elikaduraren oinarria, nahiz eta osatzeko beharrik izanez gero pentsu ekologikoa ere ematen diegun, gehigarri kimikorik eta transgenikorik gabea».

Aske hazten dira Aixuri arkumeak, amaren esnea edaten dute eta haren ondoan ematen dute bizitza guztia. Amek jaten duten bazka gehiena etxekoa da, kanpokoa osagarria bertzerik ez da. Honako galdera planteatu zuen artzainak: «Zergatik animatzen ditugu herritarrak modu horretan hazitako arkumeak erostera? Benetan gozoak izateaz gain, planetaren eta bizilagunon osasunerako onuragarriak direlako». Euskal baserriak eraberritzen ari dira eta, Gisasolaren arabera, aurrera jotzeko aukerak falta dituzte. «Une kritiko honetan, ekologia bide egokia izan daiteke abeltzainentzat, eredu horri eutsi eta etorkizuna izateko. Europako toki askotan honezkero ez da nekazaririk, baina Euskal Herrian bai. Horregatik saiatuko gara ekologiari zentzu berria ematen, ez baita mokofinen kontua izan behar, herriarena baizik. Zenbat eta artzain eta kontsumitzaile gehiago, orduan eta hobeto». Gipuzkoan, ekoizpen ekologikoa da nekazaritzan hazten ari den sektore bakarra.