DONOSTIA

Binakako Txapelketaren lehen jardunaldiak ez du ezusteko nabarmenik eman, eta pronostikoak bete egin direla esan daiteke. Ismael Chafeek eta Juantxo Kokak ezin izan zuten garaipenik dastatu ­nahiz eta Altzakoak irudi ona eman­, eta Irujo-Goñi III.a bikote faboritoak bide onetik eman dio hasiera lehiaketa luze eta gogorrari.

Zer ikusi eta zer aztertu handien beste bi partidetan egon zen. Larunbatean, Titinek eta Lasak erakustaldi ederra eman zuten Labriten, eta modu ikusgarrian menderatu zituzten Oinatz Bengoetxea eta Patxi Ruiz. Neurketa horretatik asko indartuta irten da Oskar Lasa. Etxarrikoak kantxan erakutsi du maila horretako txapelketa bat jokatzeko prest dagoela, eta izan duen lehen aukeran argitu ditu egon zitezkeen zalantza guztiak. Pixka bat jota, berriz, Patxi Ruiz geratu da. Zaleek asko espero dute Lizarrako atzelariarengandik, eta lehen partidan behintzat ez du atzeko koadroetan nahi beste agindu.

Gonzalez eta Pascual ere ­garaipena lortu duen Aspeko hirugarren bikotea­ maila oso ona emanez hasi dira. Azkaindarra partida nagusietatik kanpo utziz ibili da Eibarko enpresa azkenaldian, baina horrek ere izan duen lehen aukeran erakutsi du bere balioa. Kanporaketak hasten direnean erakutsi beharko dute, ordea, bikote fidagarria osatzen duten ala ez.

Olaizola II.a, arriskuan