IZPURA
“Erreklutatuak” (“Embedded”) da asteburu honetan EuskalHerrian lehen aldiz ikusgai izanen den antzezlanaren izena. Izenak dioen bezala, 2002ko urritik 2003ko ekainera artean «erreklutatuak» izan ziren kazetarien istorioa kontatzen du. Antzezlanak argi uzten du komunikabide handien eta botere politiko-militar-industrialaren artean dagoen sarea.
Estatu Batuetako Etxe Zuriak Iraken zeuzkan helburuak lortu ahal izateko esan zituen gezurrak komunikabideek nola ezkutatu zituzten aditzera ematen du antzezlanak. Bushen Gobernua eta hedabideen arteko lotura hertsiak agerian uzten ditu.
“Embedded” Estatu Batuetan zortzi hilabetez izan da antzeztua, New York eta Los Angelesen, eta Europan Londresko Riverside Antzokian ere ikusgai izan zen antzerki garaiko irekieran. Petit Théâtre de Pain konpainiarekin komunikabideen jokaeraren berri ematen duen lan honek Europan zabalera handiagoa izanen du.
Kontinente zaharrean dagoen egoera Estatu Batuetakoarekin ezin konpara badaiteke ere, hedabideen manipulazioa eta bideratzea gero eta nabariagoa den une honetan, gizartea iratzarriko duen gidoia aukeratu dute taldekideek. Hala, bada, Boterean daudenen mekanismoak haustea bilatzen dute antzezleek gizatasunez betea dagoen libelo satiriko eta kementsu honekin.
Le Petit Théâtre de Pain hainbat hizkuntza eta kultura dituzten hamar pertsonek osatzen dute. Konpainia horren ezaugarri nagusiak eleaniztasuna eta izaera ibiltaria dira. Proposamen kultural eta sozialak partekatzearen aldeko xedearekin antzerki bizi eta mestizoa asmatzen saiatzen dira aldiro. Taldea Georges Bigot zuzendariaren inguruan sortu zen. Théâtre du Soleil-eko aktore zena Bordeleko unibertsitatean izan zen irakasle, eta han ezagutu zuten elkar orain konpainia osatzen duten aktoreek.
Estatu frantsesean zehar bira egin ondoren, Hendaian ikusi ahal izango da maiatzaren 20an eta Biarritzen 27an.
