NAIROBI
Gutxienez hamalau pertsona hil dira hamabost iturri batzuen arabera atzo Marsabit hiri ondoan gertatutako hegazkin istripuan. Hildakoen artean bost parlamentari egon daitezke. Guztiak hegazkin militar batera igo ziren Nairobi hiriburuan, Marsabit iparraldeko hirira joateko, bertako leinuen arteko borrokak amaitzeko asmoz.
Marsabit Nairobitik 450 bat kilometrora dago, Keniako ipar-mendebaldean. Hegazkinean zihoazen politikariek bilera batean parte hartu behar zuten, Etiopiako mugatik gertu bizi diren leinuen arteko tentsiak eta borrokak amaitzeko, Mutua Iringu eskualdeko komisarioak Kenya Television Network telebista kateari esan dionez.
Iringuk eman duen bertsioaren arabera, eguraldi txarraren eraginez, ia ez zen ezer ikusten aireportuan. Ondorioz, hegazkina pistatik urrundu zen eta ondoko mendixka bat jo zuen. Berehala su hartu zuen. Lau pertsona bizirik atera zituzten, baina zaurituetako bat erietxe bidean hil egin zen. Gainerakoak kiskali egin ziren.
Kenyako Defentsa Ministerioak jakinarazi duenez, Txinan egindako Y-12 motako zama-hegazkinean hamazazpi pertsona zeuden istripua gertatu denean; tripulazioa, Gobernu funtzionariak eta parlamentariak barne.
Mutua Iringu eskualdeko komisarioak, berriz, hegazkinean hemezortzi lagun zihoazela esan du. «Garrak ikaragarriak ziren eta ezinezkoa da beste norbait bertatik bizirik ateratzea», gehitu du.
KBC telebista katearen arabera, hildakoen artean Patrick Kingola Waqoko apezpikua dago.
