GASTEIZ
Gasteizen ikusi ahal izan ziren lehen aldiz Mikel Saenz de Santa María eta Jon Castilloren lehen lanak. Joan zen asteartean eskaini ziren “Itxoiten” eta “Eskuak ukabilak” film laburrak Parral tabernan. Bi gasteiztarrak Madrilen ari dira ikasten eta euren talde eta abesti gustukoetan oinarrituta ekoitzi dituzte proiektuak. Hala nola, “Itxoiten” filmak Negu Gorriaken izen bereko kanta du oinarri, eta “Eskuak ukabilak” lanak, ordea, Berri Txarraken 2001eko diskoko kanta bi biltzen ditu. Atzo, Geu elkartearen ekimenez, lanak aurkeztera etorri ziren.
Mikel Saenz de Santa María ikus-entzunezko ikasketak egiten ari da, eta berak azaldu bezala, iazko udan New Yorkera joan zen ikastaro bat egitera, eta han bururatu zitzaion “Itxoiten” film laburra. «Metroan nengoela irakurri nuen behin eskolako irteera batean bi ume hil zirela. Jarraian gurasoengan pentsatu nuen, nola semeak agurtu eta ez ziren sekulan bueltatuko. Negu Gorriaken abestia erabat zetorren gaiarekin bat, “Itxoiten”, alegia, eta hortik sortu zen ideia», azaldu zuen Mikelek.
Filma urtebetetze festa sorpresa batean dago kokatua, non emakume batek bere bikoteari sorpresa eman nahi dion. Baina mutila ez da agertzen, eta jende guztiak zain ematen du denbora». Jon Castillok ordea, ez du ikus-entzunezko ikasketarik egiten, baizik eta telekomunikaziokoak, baina film laburren mundua gustuko duela onartu zuen.
“Eskuak ukabilak” lanak amodio-gorroto istorioak kontatzen ditu modu metaforikoak eta eskuak protagonistak direla. Berri Txarraken “Eskuak” eta “Ukabilak” kantekin lotura zuzena daukate irudiek. «Azken finean, eskuekin pentsatzen dugun baino gauza gehiago egiten ditugu-eta», nabarmendu zuen Jon Castillok.
Ez dakite filmak beste nonbait erakutsiko diren, bai ordea, zinema eta irudiaren munduan jarraitzeko gogoa dutela.
