Bizkaiko Metal sektoreko patronalak deslokalizazioa irtenbidea dela esan du
·«Krisiak» ekiditeko, enpresen produkzioa kostu merkeko herrialdeetara eraman behar dela adierazi du
BILBO
Metal arloko Bizkaiko enpresen elkarteko (FVEM) ordezkari Ignacio Saenz de Gorbeak, Jose Antonio Morketegik eta Jaime Fernandezek prentsaurrekoa eman zuten atzo Bilbon sektorearen egoeraren berri emateko. Enpresek azken urteetan lehiakortasuna galdu dutela adierazi ostean, Saenz de Gorbeak egoera hori amaitzeko deslokalizazio politikak bultzatzea irtenbidea dela esan zuen. «Balio osagarri txikiko produkzioa egiten dutenek eta besteetaz ezberdintzeko gai ez direnek etorkizun zaila dute», nabarmendu zuen.
Hala, Bizkaiko enpresen produkzioa kostu merkeko herrialdeetara eramatearen alde agertu zen. Morketegik ere ideia hori babestu zuen. Hain zuzen ere, deslokalizazioaren aldeko erabakirik hartu ezean, enpresa asko «krisian» sartuko direla adierazi zuen. «Deslokalizazioa aukeratuz gero, berriz, atzerrian hazi egingo dira eta hemen, mantendu», jakinarazi zuen.
Beste alde batetik, lehiakortasuna hobetzeko helburuarekin, Metal sektoreko enpresen elkarteko lagunek babes handiagoa eskatu zieten administrazioei. Alde horretatik, Elkarteen Zerga delakoa jaisteko eskatu zuten, Europar Batasunean (EB) erabiltzen dituzten zifretara irits dadin, hau da, %24,4 ingurura.
|
