BAIONA
Ikasle Abertzaleek bultzaturiko Euskal Herrian ikasteko eskubideari buruzko kanpaina atzo burutu zen Baionan iragandako manifestazioaren bidez. Ehun bat lagun elkartu ziren Lapurdiko hiriburuko Lauga gelatik abiatu zen desfilean.Arratsaldeko bost eta erdietan hasiz, nagusiki ikasleak elkartu zituen manifestazioak herriko kaleak zeharkatu zituen “Euskal Herrian ikasteko eskubideen alde” lema nagusipean.
Ekitaldia Baionako San Andres plazan burutu zelarik, Ibai Agirrebarrena eta Eneko Aldana Ikasle Abertzaleak mugimenduko bi kideek hartu zuten hitza euskaraz eta frantsesez. Ikasleek gaur egun Euskal Herrian ikasteko bizi dituzten zailtasunak berriz ere agerian jarri ondoren, Ikasle Abertzaleak taldeko kideek eskubide horren bermea «hezkuntza-sistema marko nazionaletik soilik» etorriko zela nabarmendu zuten.
Helburu horretara heltzeko, izan ere, ikasle mugimenduak bost neurri nagusi planteatu zituen: muga administratiboak gainditzea, hezkuntza eskaintza guztia euskal herritar ororen zerbitzura jartzea; hizkuntza muga bilaka ez dadin hezkuntza-eskaintza guztia euskalduntzea; bereziki Lapurdi, Nafarroa Beherea eta Zuberoan unibertsitate eskaintza areagotzea; Unibertsitatean sartzeko hautaprobak desagerraraztea, eta, hizkuntza muga bilaka ez dadin hauta-probak desagerrarazi bidean, euskaraz egiteko eskubidea Euskal Herriko ikasle orok izatea.
