Errenteriako 40 eragilek Udalak bere egin duen kultur politika gaitzetsi dute
ERRENTERIA
Errenteriako 12 auzo-elkartek eta 32 gizarte eragilek prentsaurrekoa eman zuten atzo Udalak aurrera daraman kultur politikaren gaineko desadostasuna plazaratzeko. Eragileok adierazi zutenaren arabera, azken urteetan arazo ugari izan dituzte ekimen sozial, kultural eta kirolezkoak aurrera eramateko, Udalak gero eta betekizun gehiago exijitzen baitizkie ekintza publikoak aurrera eraman ahal izateko eta diru-laguntzen ukapena erabatekoa izan delako.«Kultur politika honen ezaugarri nagusia planifikazio falta izan da, batez ere aurrekontuei dagokienean, eta, gainera, herrian eragina duten eta garapen kulturalarekin zerikusia duten erabakiak hartzean ez zaigu parte hartzen utzi. Udalak gero eta oztopo gehiago jartzen dizkigu ekimenak egin ahal izateko», salatu zuten. Eragileen ustez, aurten egoera honen okertzea bideratuko duen erabakia hartu du Udalak. Izan ere, diru-laguntzen gaineko araudi berria onartu du, Errenteriako eragile sozial eta kulturalen iritzia aintzat hartu gabe. Azken horiek honako salaketa egin zuten: «Araudi berriak orain arte nola edo hala egiten ziren ekimenak nabarmen kaltetuko ditu, eta horietako batzuen desagertzea ere ekar dezake, Alabergako kaldereroekin edo zenbait auzotako jaiekin gertatu den bezalaxe».
Desagertzea eta pribatizazioa
Errenteriako Udalaren jarrerak herriko kultur, gizarte eta kirol ekimenak desagertzea edo horien pribatizazioa ekar dezakeela uste dute eragileek, eta jartzen dituzten «trabak» gaindituko dituztela adierazi zuten: «Lanean jarraituko dugu herriaren onurarako diren ekimenak egin daitezen. Batzuk ezingo ditugu egin baliabide eskasiagatik, beste batzuk dugun aurrekontura egokitu beharko ditugu, baina argi utzi nahi dugu gure bizilagunekin batera gure auzoen eta herriaren alde egingo dugula».Azkenik, Errenteriako Udalarekin elkarlanean aritzeko prest daudela ziurtatu zuten, eta, denen artean, Oreretarentzat egokia den kultur politika egin daitekeela adierazi zuten.
|
