AGURAIN

Agurainen bildu ziren, euskalgintzako 25 kideren lan moldeak hobetzeko asmoarekin, eta, komunikazio, jarraipen nahiz eragite lanean abiatu dituzten ekimenen berri eman zioten elkarri.

«Bide batez, zenbait herrik martxan jarritako proiektuak azaldu dituzte eragileek, horiek gainerako herrietara hedatzeko asmoz», argitu zuten Kontseiluko ordezkariek.

Mintegiak bi zati izan zituen. Alde batetik, eragite lana aztertu zuten; hau da, kideek beren esperientziak trukatu zituzten, besteak beste, «proiektu arrakastatsuenen azalpena edo erraz egin daitezkeen egitasmoena», Kontseiluko bozeramaileek azaldu zutenez.

Lurralde guztietako ordezkariek izan zuten beren esperientzia aurkezteko parada. Arabari dagokionez, Aguraingo herriko institutuan proiektua gazteei hurbiltzeko asmoz egindako lana aipatu zuten. Gipuzkoan, berriz, Soraluzeko kideek antolatu berri duten Normalkuntza Eguna aurkeztu zuten. Horren helburua eragileek euskara eguneroko lanetan nola erabiltzen duten azaltzea da.

Nafarroa eta Ipar Euskal Herriko kideek, aldiz, zozketa desberdinak izan zituzten hizpide:Bortzirietako zozketa nafarrek eta Azkaingo zozketa lapurtarrek. Azken horiek, gainera, gazteentzako marrazketa lehiaketa ere antolatu dute.

Azkenik, Bizkaia aldetik, Lea-Artibaiko eragileei banatu dioten sektorekako hiztegia aurkeztu zuten.

Mintegiaren bigarren zatian, Bai Euskarari Akordioa Herrietan egitasmoa aztertu zuten kide guztien artean. Izan ere, Kontseiluko Zuzendaritzak erabaki zuen iazko abenduan herrietan garatuko den dinamika zehatzaren plangintza euskalgintzako kideak kontuan harturik egingo zela.

Kontseiluko bazkideek eta herrietako euskalgintzako kideek elkarrekin definituko dute aurrerantzean jarraitu beharreko bidea. Prozesua errazteko asmoarekin txostena banatu zitzaien parte-hartzaileei. Era berean, Kontseiluaren antolakuntza eredua ere landuko dute. «Antolakuntza guztion artean hobe dezakegu», adierazi zuten antolatzaileek.