- N1
Oraingoan egin beharrekoa ongi egin da
AVIRON 1
TOURS 0
BAIONA
Bapo sufrituta, baina azkenean Avironek garaipena lortu zuen, eta mailari eusteko urrats handia egin zuen. Oraindik jaitsierako arriskua ez dauka baztertuta, baina atzoko garaipenak indar handia emango die, Bigarren Mailara igotzeko borrokan dabilen talde bat hartu baitzuen mendean. Lehen zatian, kanpotarrek gogor ekin zioten partidari eta lehen bost minututan bi aukera on izan bazituzten ere, Aviron ongi kokatu zen zelaian, eta partidaren jabetza hartu zuen. Nagusi izan ziren zelaian, baina gol bat egiteko aukera garbiegirik ez zuten egin. Toursekoak, berriz, ia ez zuten zelai erdia gainditu. Bigarren zatian ere kanpotarrak erasorako gogoz zelairatu ziren, baina berehala hartu zuen Avironek partidaren jabetza. Nagusi ziren zelaian, hala ere, golerako ez zuten aukerarik egiten, baina azkenean iritsi zen euskaldunen gola. Hamazazpigarren minutuan Chakirrek zelai erdian baloia harrapatu, hark Lestageri pasa, eta haren erdiraketa Vareillesek barrura. Hortik aitzinera, Aviron atzean sartzen hasi zen, eta kanpotarrak berdinketaren bila abiatu ziren. Azkeneko minutuetan dezente sufritzea tokatu zen, baina azkenean puntuei eutsi egin zien Avironek.
|
