Unibertsitatea aldatzeko bidean «eztabaida integrala» behar dela esan dute
BILBO
Hezkuntza Deialdia dinamikaren barruan, irakaskuntza arloko hainbat langile prentsaren aurrean agertu ziren atzo Bilbon, «Euskal Herriak bere unibertsitatea» behar duela berretsi eta hori helburu hartuta, egin behar diren urratsak mahai gainean jartzeko. Hartara, Euskal Herriko unibertsitate esparruan «aldaketak» behar direla garbi izanda, horien gaineko «eztabaida integrala» burutu dadin baldintzak sortzeko deia egin zieten erakunde publiko, akademiko eta herri ekimenezkoei.
Nabarmendu zutenez, martxan den Bolognako prozesuak «unibertsitate-eremua eraldatuko du» eta Euskal Herriko unibertsitate esparrua «ez da prozesu horretan salbuespena izango». Gauzak horrela, “Inposaketarik ez, Euskal Herriak bere hezkuntza” izenburua duen manifestua sinatu duten profesionalek garbi daukate aldaketa horien guztien aurreko eztabaida eta hausnarketa «euskal unibertsitate-komunitatearen, hezkuntza-komunitatearen eta euskal gizartearen gidaritzapean eta bere parte hartzearekin eman beharko dela».
Bide beretik deia luzatu diete hezkuntza komunitate osoari eta euskal gizarteari: «Gisa honetako eztabaida baten beharraren aldarrikapenarekin bat egin dezagun eta hitzartu dezagun Euskal Herriak eta euskal gizarteak nahi eta behar duen unibertsitate eredua».
Eurek garbi daukatenez, «unibertsitateak goi-mailako prestakuntza orokorra eta lan munduan txertatzeko behar duena eskaini behar die herritarrei eta ez da soilik zerbitzu indibiduala, funtsezko zeregina du gizartearen garapen sozial, kultural eta zientifikoan».
|
