Haurren minbizia errealitate bat delako
Haur minbizidunen familiek hitzordua izanzuten atzo OrdiziakoOiangu parkean. Jaia izan zen nagusitxikientzat; egoeraberdinean daudenekin partekatzeko aukera, gurasoentzat. Hitzorduaren helburua haurren minbizia ezagutzera ematea izan zen, «gizartean tabu bat delako».Politikarientzat ereizan zuten hitzik,egoerak merezi duenerantzuna eman dezaten, bai arlosozialean eta baiekonomikoan.
Jai giroan eta eguzki gozoarekin, Gipuzkoako Aspanovas elkarteak Haur Minbizidunen Gurasoen Elkarteak antolatuta festa izan zen atzo Ordiziako Oiangu parkean. Bertan bildu ziren Bizkaiko eta Arabako aipatu elkarteko kideak ere, beren egoera berdina bizi dutenekin egun-pasa egiteko asmoz.
Haurrak izan ziren eguneko protagonista, haientzako antolatutako jolasak, gaztelu puzgarriak, pailazoak, buruhandiak eta halakoak baitziren prestatutako egitarauan jaun eta jabe. Hala ere, gurasoentzat ere garrantzitsua zen hitzordua; Aspanovasek nabarmendu zuen: «Ezinbestekoa da egoera berdina bizi duten gurasoak harremanetan jartzea. Hala, gaixorik dauden beste haur askok aurrera egiten dutela ikusten dute eta hori pizgarri handia da haientzat. Gaixotasuna gainditu daitekeela ulertzen dute, eta hori ez da gutxi».
Egun guztian jaia arratsaldeko zazpietan amaitu zen Ordiziako Babes Zibileko eta DYAko kideak Oianguko parkean egon ziren, badaezpada ere, haurren batek beren laguntza behar bazuen ere. Izan ere, atzo Oiangun zeuden haur asko tratamenduan daude.
Urterokoa da atzo Ordizian izan zen topaketa urtero toki desberdinean izaten den arren eta helburu dauka haurren minbizia ezagutzera ematea. «Minbizia berez tabu bat da; beldurra dugu minbiziaz hitz egiteko oro har. Eta, gainera, haurrena baldin bada, beldur hori areagotu egiten da. Gaia gizarteratu egin nahi dugu, ezagutzera eman, denen artean minbizia duen haurrari eta haren familiari lagundu ahal izateko. Eta laguntza handia behar dute bai haurrek eta bai gurasoek. Gauza jakina baita eritasuna oso gogorra dela», agertu zuen Aspanovasek.
laguntzak behar dituzte
Jaitik ez ezik, aldarrikapenetik ere izan zuen atzoko hitzorduak. Izan ere, minbizia duen haurraren familiak egoera berezia bizi du: egun asko eman behar dituzte erietxean, eta lan baimenak behar dituzte horretarako. Gainera, joan-etorrietan ere diru dezente joaten zaie. Hartara, bi norabidetako laguntzak eskatu zizkioten Administrazioari atzoko jaian parte hartu zutenek; laguntza sozialak batetik, gurasoen laneko baimenekin-eta arazorik egon ez dadin. Eta, bigarrenik, laguntza ekonomikoak, horiek ere behar baitituzte.
Aspanovas elkartea 1996 urtean sortu zuten eta egun Gipuzkoan, Bizkaian eta Araban dauzka bazkideak. Asmoa da haur minbizidunen gurasoen topaleku izatea, beren kezkak, arazoak eta hausnarketak parteka ditzaten. Urtez urte zenbakiak aldatu egiten badira ere, batez beste Gipuzkoan eta Araban urtean hamabi bat haur minbizidun diagnostikatzen dituzte. Bizkaian, berriz, batez besteko kopuru hori 50 haur minbizidunetara iristen da. -
|
