DONOSTIA

Igeldo Harria 134 kiloko harri baldarra da, eta horrelako gainerako harriak bezalaxe, jasotzerakoan zailtasun dezente izaten ditu. «Behetik ateratzea kostatzen da gehien», esan du Goenatxo II.ak. Izeta II.ak eta Goenatxok azken urte hauetan lehia dezentea izan dute, baina iaz aiarrak bereganatu zuen txapela, eta aurtengorako ere bera da irabazteko faborito nagusia, eta horixe bera pentsatzen du Goenatxok ere: «Iaz berak irabazi zidan, eta aurten oso zaila ikusten dut bera gainditzea. Gainera, nik garaipena lortzeko berak baino jasoaldi bat gehiago eman beharra daukat. Berdinean, berak ni baino kilo gutxiago pisatzen duenez gero, berak irabaziko luke, eta Izeta baino jasoaldi bat gehiago ematea oso zaila ikusten dut», adierazi du azkoitiarrak.

Hala ere, lehen bi postuetan amaitzeko itxaropenik ez zaio falta: «Irabaztea oso zaila ikusten dut, baina lehenengo ez bada bigarren amaitzeko itxaropena badaukat», esan zuen lehian arituko den kirolaririk beteranoenak, datorren urrian 47 urte beteko baititu.

Lehiaketa honetan kirolari gazteak ikusteko parada ere izango da, eta hortxe izango dira Telleria anaiak, biak ere 20 urte baino gutxiagorekin. Gero, plazetan gehiegi ikusten ez direnak ere badira, Lasarte edo Igoa, esaterako, beste izen handiekin batera, Izeta II.a eta Goenatxoz gain, Izeta III.a eta Elosukorta ere bertan izango baitira. Adituen ustez, bi horiek borroka dezente izan dezakete hirugarren postua eskuratu ahal izateko.