Portu-zirkulazioa igo egin zen ekain arte Bilbon eta Pasaian
Bilboko eta Pasaiako portuen urteko lehen sei hilabeteetako datuak argitaratu dituzte, eta horien arabera, epe horretan kudeatutako portu-zirkulazioa batez beste %10 hazi da. Portuetatik pasatako merkantzia-ontziei begiratuta, hala ere, Pasaian %0,87 jaitsi da; izan ere 2005ean urtarriletik ekaina arte 803 ontzi izan ziren portuan, eta aurten 796.
BILBO
Estatuko Portuak argitaratutako datuen arabera, Bilboko eta Pasaiako portuetan kudeatutako batez besteko portu-zirkulazioa tonatan eta urteko lehen sei hilabeteetan %10,85 eta %9,66 hazi ziren hurrenez hurren, iazko garai bereko datuekin alderatuta. Era berean, Bilbon ekainera arte izandako zirkulazio tamaina 18,4 milioi tonara igo zen; joan den urtean, berriz, 16,6 milioi tona izan ziren. Pasaian, berriz, joan den urtean 2,6 milioi tona jaso zituzten, eta aurten, 2,9 milioi tona. Bi portuetan garraiatutako merkantziei dagokienez, Pasaian 1,15 milioi tona izan zituzten, eta 2005ean, 1,1 milioi tona; hau da, %4,9 emendatu da. Bilbon iaz 4,6 milioi tona bildu zituzten, eta aurten, 4,7. %1,4 igo da, beraz.
Beherakada Pasaian
Datu negatiborik izan da, hala eta guztiz ere; izan ere, merkantzia-ontziak Bilboko Portuan %2,3 emendatu ziren; Pasaiako Portuan, berriz, %0,87 jaitsi ziren. Aurten urtarriletik ekaina bitartean 1.812 merkantzia-ontzi pasatu ziren, gainera, Bilbotik; joan den urtean 1.771 izan ziren. Pasaian, aldiz, iaz 803 merkantzia-ontzi pasatu ziren portutik, eta aurten, 796. Azkenik, bidaiari kopuruari eta itsas bidaiei erreparatuta, Bilboko portuan %4,6 igo ziren bidaiariak. Zehazki, 2005eko lehen sei hilabeteetan 65.729 bidaiari pasatu ziren Bizkaiko portu horretatik, eta 2006an, 68.751. Itsas bidaiak %3,7 hazi ziren; iaz 27 izan ziren, eta aurten, 28. Pasaiako portuak ez du zerbitzu hori eskaintzen.
|
