Tomas Larrañaga Ekonekazaritzako lehendakaria da. Aspalditik ibili da «bio» faltsuen aurkako kanpainan. Egun, pozik dago hartu berri dituzten neurriekin, baina, hala ere, jendeak horren guztiaren gaineko informazio eskasa duela salatzen du.­

Uztailaren 1etik aurrera hainbat enpresak ezin izan dute produktuen izena mantendu «bio» aurrizkiarengatik. Zer iritzi duzue horren inguruan?

Europa guztian nekazaritza ekologikoaren inguruko araudiak bere horretan jarraitu du, baina Madrilek, Nekazaritza, Arrantza eta Elikadura Ministerioaren bitartez, errege dekretua aldatu zuen. Honela, enpresek produktuei berez ez zeukaten kalitate bat ezarri diete. Euskal Autonomia Erkidegoan ere aldatu zuten, gauza bera egiteko asmoz. Guk askotan salatu dugu, ez baitugu inoiz hori ondo ikusi ezta onartu ere, baina Administrazioak ez digu inongo kasurik egin.Danonek aspalditik erabiltzen zuen «bio» aurrizkia, baina gero Kaikuk, Pascualek eta beste hainbat enpresak erabili izan dute. Guri izugarrizko kaltea egin digute. ­

Zein da horrek guztiak ekarri zuen arazo nagusia?

Azken finean, jendeak ez dauka batere garbi zer den nekazaritza ekologikoa, eta honenbestez, pentsatu izan dute beste enpresa horiek guztiek ekoizten zituzten produktuak nekazaritza ekologikoan oinarrituta zeudela, «bio» aurrizkia zeramatelako.­

Zer neurri har daiteke jendeak nekazaritza ekologikoaren inguruan gehiago jakin dezan?

Nekazaritza ekologikoak ez du publizitate zuzen edo administratiborik eduki sekula. Horregatik jendeak ez dauka garbi zer den nekazaritza ekologikoa. Hala eta guztiz ere, guk antolatu izan ditugun ferietan,  kartelak jartzen saiatu izan  gara jendea kontura zedin «bio» aurrizkiari nolako erabilera desegokia ematen zitzaion.Guri beti esan digu Administrazioak nekazaritza ekologikoaren promozioa egingo zuela. Hasi gara dagoeneko horren inguruan hitz egiten Kalitate Departamentuarekin. Aurten irratian soilik egingo dute, ez dagoelako horri zuzendutako aurrekontu handirik.

Noiz hasi ziren bestelako enpresak «bio» aurrizkia beste modu batean erabiltzen?

Lehena esango nuke Danone enpresa izan zela. Hasieratik epaitegietan bukatu duten istilu ugari egon izan da hainbat enpresaren artean ere. Baina azken batean, honetan guztian kaltetuak atera direnak gu geu gara, nekazaritza ekologikoan aritzen garenak. Ez dugu inoiz eduki produktua ezagutzera emateko inongo laguntzarik. Oraindik ez dute promoziorik sekula egin.

Esan al daiteke Europan oro har betetzen duten araudia gaur egun ere hemen betetzen dutela?

Europan araudia ez dute inoiz aldatu. Madrilgo Ministerioa izan zen errege dekretua aldatu zuena, eta «bio» hitza enpresa konbentzionalei erraztu zien. Hemen ere gauza bera pasatu zen, helburu berekin dekretua aldatu zuten. ­

Zein da gaur egun Ekonekazaritzaren betebeharra?

Ekonekazaritza hainbat elkartez osatutako federazio bat da. Bost elkarte daude Euskal Autonomia Erkidegoan. Bi Araban ­Bionekazaritza eta Naturaraba­, bi Bizkaian ­Ekolur eta Lurreko ­ eta bat Gipuzkoan ­Biolur­. Ekonekazaritzak azken batean denekin egiten du lan. Gainera, Gobernuarekiko harremanak errazten ditu federazio honek. Gobernuak beti eskatu izan du berekin harremanetan jarri ahal izateko autonomietako erakunde bat, eta, honenbestez, Ekonekazaritza izango litzateke baldintza hori betetzen duena. Gure barruan dauden elkarteek ez dute baldintza hori betetzen. Oraingoz Federazio hau publikoa eta probisionala da. Hamar urte daramazkigu kontseilu probisional moduan. ­

Zein mementotan dago gaur egun ekoizpen ekologikoa Euskal Herrian?

Eremu honetan gertatzen ari den hazkuntza etengabea da. Egun 180 operatzaile egongo dira, baserritar eta elaboratzaileen artean. Baserritarrek lehengaiak bideratzen dituzten arren, gero elaboratzaileen eskutik pasatu behar dute. -

M.U.