Antzartek erabiltzeko prest dago. Nahiz eta gaur betiko antzarrekin jokatuko diren, proiektu honen nondik norakoak jakiteko, parte hartu duten eragile ezberdinekin mintzatu da GARA. Udala izan da egitasmo hau bultzatu duena, eta bertako zinegotzi den Mikel Egigurenek antzarra ordezkatu dezakeen tresna hau nolatan sortu den azaldu du: «hegaztien gripea zela eta Europar Batasunak agindu zuen hegaztiekin jarduteko debekua. Berehala konturatu ginen benetazko antzarrekin ezin izango zela zerbait publikoa egin, eta beraz, Antzar eguna ere ez».

Aurrera jarraitzeko asmoa

Kezkatuak zeuden Lekeition, eta zeozer egin beharra zeukaten. Mikelek kontatu duenez, «Markinan adibidez, iñauteritako jaia bertan behera utzi zuten. Guk pentsatu genuen jaiarekin aurrera segitzea, eta horretarako bileretan hasi ginen. Komisioko batek eman zuen ideia: Zergatik ez dugu egiten plastiko edo gomazko antzar bat, benetakoarekin ahalik eta itxura gehien duena? Pertsona hori Gaiker-ekin harremanetan jarri zen. Bien artean udaberri guztia eman zuten prestatzen. Uztailan joan ginen Gaiker-era eta mahai gainean jarri ziguten Antzartek; harrituta gelditu ginen. Oso oso ongi zegoen». Hasiera batean ontzat eman arren, frogatzea falta zen benetan balio zuen jakiteko. «Antzarretan parte hartzen dutenekin bileretan genbiltzan eta frogak egiteko deitu genituen. Harrera oso oso ona izan zan». Dena den, antzar biologikoarekin jokatzea garrantzizkoa omen da, eta halakoak erabiliko dira. Mikelek azaldu duenez, «osasun sailak baimena eman du analisi batzuk egin ondoren, eta ez dago inolako arazorik. Badaiteke aurten ez erabiltzea Antzartek. Dena den, orain behintzat lasai gaude, arazorik badago, badaukagu aurre egiteko modua». Hain garrantzitsu bihurtu den ohitura honi buruz galdetuta, zera argitu du: «historikoki, antzar txokoak kantauri itsasoko portu gehienetan egiten ziren. Hemen mantendu egin dira, eta izugarrizko indarrarekin. Jaietako gauza garrantzitsuena da».

Gaiker zentru teknologikoko zuzendaria den Iñaki Letonarentzat ere antzarra garrantzitsua da. Esan duenez, gustora hartu zuten hau ordezkatzeko tresnaren eginkizuna. Gaiker IK4 Euskal Herriko teknologia sarearen barruan kokatzen da. Zuzendariak argitu duenez, 150 langile eta 9,2 miloi eurotako aurrekontua dute. Lau lan arlotan aritzen dira: Polimeriko eta composite gaiak lantzen, industria gaiak, ur eta lurzoruarekin lotutako ingurumen arloa eta birziklatze lanetarako ingurumen zerbitzua dituzte. Lekeitio herriarekin harremana aspalditik dauka Iñakik eta Antzar Jokoa arriskuan ikusi zuenean, Juanfran Agirrerekin batean prestatu zuen proiektua. Bera kimikaria da, eta Juanfran ingeniaria; bien ezagutzak batuz, antzarraren antzekoa izan eta funtzio bera bete zezakeen zerbait bilatu zuten. Horretarako, bi zatiz osaturik omen dago Antzartek: batetik alde mekanikoa dago eta bestetik, kanpoko itxura. Lepoa aleatorioki hausten da mekanismo berezi bati esker eta itxura emateko erabili dugun poliuretanoak, begibistarako eta ukimenerako antzarraren ezaugarriak ditu.

Behin material ezberdinekin frogak eginda, egokiena aukeratu eta tiratze probak egin ziren. Hasieran laborategian eta gero boluntarioekin Lekeitio eta Mendexa arteko zubian. Kuadrila ezberdinetako tiralariek probatu eta amaitutzat eman omen zuten Antzartek. Dena den, hau prebentzio lana izan dela eta antzarrarekin jokatzea beharrezkotzat jo du Iñakik. Zentruko zuzendari bezala, tresnak hasieran zehaztu ziren baldintza guztiak betetzen dituela eta behar izanez gero erabiltzeko prest dagoela dio. «Titadine» eta «WC komuns» tiralarien koadrilentzat Antzartek alternatiba moduan ongi badago ere, ahal den bitartean benetako antzarrarekin jokatzea funtsezkoa iruditzen zaie. Horrela egingo dute gaur. -

LEKEITIO