Oliba-olioaren prezioa jaitsi egin zen abuztuan
·Joan den hilabetean, entsaladako tomatea eta piper berdea ere merkatu ziren
MADRIL Oliba-olioaren prezioa %3,96 jaitsi zen abuztuan, eta orain arteko joerari eutsi dio, nahiz eta urtebetean gehien garestitu den oinarrizko janaria izaten jarraitzen duen, %34,09, Industria Ministerioak agertutakoaren arabera. Horiek hala, oliba-olioaren litroa 4,38 euroan saldu zuten abuztuan. Horrez gain, joan den hilabetean bestelako produktu freskoen salneurriak ere jaitsi ziren, hala nola, entsaladako tomatea, %1,72 merkatu zen, piper berdea %2,52, txirla %4,08 edo legatza %2,15.
Udareak garestiago
Beste alde batetik, joan den hilabetean, udareak %5,51 garestitu ziren, bai eta sagarrak %2,21, laranjak %1,57; eta oilaskoaren haragi freskoa, berriz, %1,14. Ontziratutako produktuei dagokienez, nahiko egonkor mantendu dira, nahiz eta salneurriek igoera eta jaitsiera arinak izan dituzten, oliba-olioarenak izan ezik. Abuztuan, urtebeteko ardo beltzaren prezioa %1,26 merkatu zen. Aurtengo prezioak joan den urteko salneurriekin konparatuz gero, gehien garestitu den produktu freskoa izokina izan da %16,15 igo da, eta ondoren honako produktuak garestitu dira gehien: zerba %14,52, tipula %12,46, piper berdea %12,42 eta primerako txekorra %8,96. Merkatu, aldiz, laranjak egin dira gehien. Iaz baino %9,45 gutxiago balio dute aurten, eta ondoren, limoia, urezko udarea eta legatza merkatu dira gehien. Oliba-olioaren %34,09ko urteko igoerarekin batera beste ontziratutako produktuak ere garestitu dira; olioan dagoen atun argia esaterako %10,72, urtebeteko ardo beltza %8,84, espagetiak %7,19, izoztutako legatza %6,07 eta tomate naturala %4,47. Iazko salneurriekin alderatuz, aurten gehien merkatutako ontziratutako produktuen artean eskabetxean dagoen muskuilua izan da lehena %3,70 jaitsi da, gari irina %3,04 eta babarrun txuri estra ondoren %2,45. Industriak argitaratutako elikagaien salneurrien erlazioa aurreko hilabeteko lehen hiru asteen datuekin egiten dute, eta ondoren produktuek gehienetan duten prezioen batez besteko haztatua egiten dute.
|
