BILBO
Patxi Zabaleta Aralarreko koordinatzaile nagusiak atzo RNEn egindako adierazpenetan ziurtatu zuen Bata- suna «berriz legezkoa» izateko, gainerako alderdiek eman behar dituzten pausoei jarraitu beharrean, «akordio politiko baten fruitua izaten» saiatzen ari dela.Hala, «legeztatzearen» truke alderdien mahaia osatzeko ustezko aurreakordio bat aipatu zuen Zabaletak, eta hori alderdi abertzalerako «garaipen politiko bat» izango dela esan zuen. «Batasunak egun guztiz legezkoak diren hainbat alderdi kontrolatzen ditu, eta horien izenak erabiliz jardun ahalko luke; besteren artean, EHAKren, ANVren eta hain ezagunak ez izan arren erregistratuak dauden beste batzuen izenean», azaldu zuen Aralarreko buruak.
ETAren azken “Zutabe” aldizkarian esaten dena beste «akats bat» dela ziurtatu ostean, Batasuneko militanteei zuzendu zitzaien Zabaleta.«Batasunan politika egin nahi dutenek, eta egon badaude, legeztatzea ETAk egindako negoziazio baten bidez lortu nahi al dute?», galdetu zuen.
Horri ondokoa gaineratu zion: «Prozesua neurri demokratikoetan izateko argi ezberdindu behar dira baketzea, hau da armak uztea, eta izaera politikoa duten gainerako gauza guztiak: preso eta biktimen ardura, besteren artean».
Errekurtsoa, SAren auzian
Bestalde, bihar aztertuko du Auzitegi Gorenak Manos Limpias taldeak Juan Mari Atutxa absolbitzearen kontra aurkeztutako errekurtsoa. Gasteizko Legebiltzarreko presidente ohiari, Gor- ka Knorr legebiltzarkide ohiari (EA) eta Kontxi Bilbao legebiltzarkideari (EB) Sozialista Abertzaleak ez desegiteagatik «desobedientzia» delitua leporatu zieten, baina auzia aztertu ostean, absolbitzea erabaki zuen EAEko Auzitegi Nagusiak.
