BILBO

Egoera oso ezberdinean dauden bi talde izango dira igandean aurrez aurre San Mamesen. Vila-realek lau partida galdu ditu jarraian azken asteetan ­azkena Kopan, Bigarren Mailako Valladoliden kontra­ eta Athleticek, aldiz, hamar puntu lortu ditu Ligako azken lau jardunaldietan.

Igandeko norgehiagoka irabaziz gero, zuri­gorriek etsaiari puntu bakarra kenduko liokete sailkapenean, oraindik behera begira bizi baitira gaur egun.

Ildo horretan, Andoni Iraolak ekarri zuen atzo gogora mailaz jaisteko postuetatik bi puntura besterik ez dagoela oraindik Athletic. «Azkenaldian emaitza onak izan ditugun arren, behetik irtetea zenbat kostatzen den ikusten ari gara ­esan zuen­. Denboraldiaren lehen itzulia amaitzear dago eta etxean garaipen bakarra lortu dugu, eta hori oso emaitza pobrea da oraindik». Gipuzkoarrak, halere, taldeak «ideiak orain nahiko argi» dituela uste du, baita «jokatzeko era aldatu» duela ere. «Zuzenago jokatzen dugu, eta jauziei eta bigarren jokaldiei garrantzi handiagoa ematen diegu. Halere, partidak erabakitzeko lasaitasuna falta zaigu oraindik, baina hori konfiantzarekin batera helduko da».

Iraolak, hala ere, Vila-realen aurkako partida irabaztea espero du, Pellegriniren taldeak «oso jokalari onak» dituela uste duen arren.

Partida horretarako, bestetik, baliteke Fran Yeste jokatzeko prest egotea. Basauriarrak gripea izan du, baina hobera egin du eta atzo taldearekin batera egin zuen lan. Javi Casasek, aldiz, sukarrarekin jarraitzen du amigdalitisaren ondorioz, eta badirudi ez dela jokatzeko prest egongo. Gauzak horrela, litekeena da Fernando Amorebietak jokatzea ezker hegalean, mementoz ez dirudi-eta Manek Iban Zubiaurre deituko duenik.

Entrenatzaileak azken saioa zuzenduko du gaur Faduran, arratsaldeko bostetatik aurrera eta ateak itxita.