Agian Moncho Lopezek zuzentzen zuen lehenengo neurketa zela-eta, bere jokalariek lana latz egin zutelako, edo agian Fisacen taldeak igande eguerdian erdi lo ekin ziolako partidari, dena dela, Caja San Fernandok ongi merezita irabazi zion atzo Bruesa GBCri. Hirugarren laurdenetik aurrera odol gehiago erakutsi bazuten ere, donostiarrek ez zuten aukerarik ukan andaluziarrei gailentzeko.

Carles Marco eta Antonio Bueno izan ziren donostiarren defentsa mila puska egin zutenak. Gipuzkoarren defentsa ohi baino askoz ere bigunagoa izan zen eta, apika Kammerichsen faltagatik, errebotean ere ahulezia nabaria izan zuten Fisacenek.

Une batez, desesperazioak jota edo, aldaketa guztiak martxan jarri zituen Extremadurako entrenatzaileak eta gipuzkoarren minutu tristeenetan, Santamaria, Esteban Martinez eta Ionut Dragusin bera ere kantxan batera azaldu ziren. Hala, atsedenaldira markagailua 53-34 zela iritsi ziren.

Hirugarren aldiko erreakzioa

Hala ere, Porfirio Fisacen gizonek ez dute sekula etsitzen, ez baitaude hain erraz etsitzeko moduan. Horrela, tenore eta, batez ere, ganora handiagoz kantxaratu ziren donostiarrak hirugarren aldian.

Partida ez zen kalitate handikoa, baina kalitatearen faltan, intentsitate handiz defendatuta, apurka hurbiltzen hasi ziren gipuzkoarrak. Horiek hala, azken laurdenera 70-60 iritsi ziren.

Ez zegoen, baina, aukerarik. Bradleyk ezin zuen Bueno gelditu eta Marco ere bikain aritu zen. Zortzi puntura hurbildu ziren donostiarrak, baina ez zuten gehiago egiteko paradarik eduki. Ondorioz, 86-79 amaitu zen atzoko partida.