Haize ororen gainetik, Gasteizko Postas kalean hitzordua zegoen atzo, Tau Baskonia-Maccabi taldeen partida bezperan, Israeli Boikot euskal ekimenak eta Indar Baskonia taldeko zenbait kidek deitua.

Ikurrinak, Palestinako banderak eta baita «euskal preso eta iheslariak etxera» zioen kartel bat hartuta, hedabideei zaletu hauek «kezka» eta «egonezina» azaldu zuten Israelgo Maccabiren helduera zela-eta. Hala, Israelgo taldea «talde non grato» eta haren zaleak «persona non grata» izendatu zituzten manifestu bateratu batean.

«Modu baketsuan, baina indar guztiz» egin zuten beren salaketa. Indar Baskoniako Ibai Trebiñok lehen eta Israeli Boikot euskal ekimeneko Ruben Sanchezek ondoren. Hasteko eta behin, atzokoa ez zela «Indar Baskoniaren komunikatu ofiziala» argitu zuen Trebiñok. «Orain dela bost urte Mossad-ek eta Ertzaintzak koordinaturik hartutako neurri polizialik berriz ere gertatzerik ezin dela onartu», adierazi zuten jarraitzaileek.

Duela bost urte «pabiloi osoa miatu zuten haurrak barne: «Kamisetak, palestinar zapiak, ikurrinak kenduarazi zizkiguten eta kantxan Israelgo propaganda ezarri zuten».

«Estatu sionistaren» interesak

Duela bost urteko erreferentziaren ondotik, «estatu sionistari» buruzko kritika nabarmendu zuten komunikatuan.

Ez dute onartzen Israelgo taldeak Euroligan izan daitezkeen bakarrak izatea; eta Libanon, Jordanian, Sirian... dauden taldeak baztertzea.

Aldi berean, zaleek ez dute onartzen Israel «estatu sionistaren» interes poltikoak kirol leihaketen bidez ezartzerik ez eta zuzenbide estatu legezko itxurak ematea ere. Komunikatua amaitu zuten esanez, inongo euskal taldek ez lukeela talde israeldarren kontrako partidarik jokatzerik onartu beharko iritzi zioten. Baita euskal zale guztiek odolez zikindutako partida hauek boikoteatu behar liratekeela ere, Maccabi Tel Avivi beren gaitzespen osoa adierazi diezaioten.

Gaurko, berriz, ez dela «bestelako ekintzarik» burutuko eta «duela bost urteko gertakaririk ez dadila errepikatu» aipatu zuen Ruben Sanchezek ekitaldiari amaiera emateko.