Hirugarren astez jarraian, Athletic sailkapenaren goialdeko talde baten aurka arituko da asteburu honetan. Oraingoan, izenik gabeko etsaia izango du, baina Recreativo nolako denboraldia egiten ari den kontuan hartuta, norgehiagoka aurrekoak bezain zaila izango dela ziurta daiteke hasi aurretik.

Zoritxarrez, talde zuri-gorriaren egoera ez da berbera, larriagoa baizik. Sevillaren eta Real Madrilen aurka behartuta bazegoen, are gehiago bihar, bi partida horietan punturik lortu ez duela kontuan hartuta. Horiek hala, Athletici ezin zaio axola arerioa zein den ez eta zein helburuekin edota ibilbidearekin heltzen den partidara ere; nahikoa dute bilbotarrek beren arazoekin.

Zein dira arazo horiek? Argi daude, nagusiak gutxienez: taldearen egoera sailkapenean eta azken bolada honetan areagotu diren jokoaren gabeziak. Batez ere, golak jasotzeko erakusten ari den erreztasuna.

Ander Murillok argi utzi zuen atzo Nuevo Colombinotik hiru puntuak ekartzeko zuri-gorriek egin behar duten lehen gauza, «golik ez jasotzea» dela. Hala, bi helburu lortuko lituzkete: bilbotarren konfiantza handitu, aurreko asteetako hondamendia etendu eta «Recreativori min egiteko lehen urratsa eman, hala puntu bat ziurtatuta edukiko dugulako. Eta gero, gainontzeko bien bila joan beharko ginateke», esan zuen jokalari donostiarrak.

Helburu hori eskuratzeko, ezinbestekoa izango da «zelaira irteten diren hamaika jokalarien konpromisoa». «Kontzentrazio eta intentsitate osoz ekin behar diogu partida honi, batez ere Recreativok bere zelaian oso puntu gutxi galdu duela ikusita. Baina egin behar duguna argi badaukagu eta guztion konpromisoa lortzen badugu, hiru puntuak eskura ditzakegu», azaldu zuen.

Hala espero du Murillok, norgehiagoka horrek «izugarrizko garrantzia» baitauka harentzat. «Garaipena lortuz gero» azken boladako jauzia geldituko lukete bilbotarrek, baita «helburutik oso gertu» geratu ere.

Josu Sarriegi taldekidearekin ados azaldu zen partidaren inportantziari buruz hitzegiterakoan. Baina bere ustez, taldeak erabil dezakeen bideak ez dauka horrenbesteko garrantzia, beti ere helmuga berberara heltzen bada. «Egia da hainbeste gol ez jasotzen saiatu behar dugula, baina helburu bakarra puntuen bila joatea daukagu. Berdin dio lau gol jasotzen baditugu -esan zuen, lehen itzulian Recreativok San Mamesen 4-2ko emaitzaz galdu zuela gogoraratuta-, partida amaieran garaipena eskuratzen badugu».

Azken saioa Huelvan

Atzo spa saioa izan ondoren, Athleticek asteko azken saioari ekingo dio gaur. Ateak itxita, Huelvan eta arratsaldez izango da, zuri-gorriek goizean bidaiatuko baitute Andaluziara. Momentuz, deialdirik ere ez dago, talde osoa joango baita.