Partida txarra jokatu zuen atzo Tauk; bizkorregi egin nahian gauzak, jaurtiketa larregi huts eginda eta baloi ugari galduta. Baina irabazi egin zuen eta Gasteizen erabakitzeko aukera izango du. Marcus Brownek hortik zehar dabilen bideo batean esan zuen legez, we'll see at Tau!

Tentsioa eskatzen zuen atzoko neurketak. Galdu edo irabazi; hara Baskoniaren trantzea atzo.

Hala, kontzentraturik eta indartsu ekin zioten partidari gasteiztarrek, Erdogan hasierako bostekoan sartuta Rakocevicen ordez. Bartzelonakoen aldetik Mario kasun kroaziarrak hasiera bikaina eman zion partidari, baina bi falta berehala egin zituenez, kantxatik atera behar izan zuen Ivanovicek. Bikain profitatu zuen Tau Baskoniak horretaz. Scolaren eskutik 4-13 aurreratu ziren arabarrak.

Urrunetik ez zuten batere asmatzen katalanek -bost minutu egon ziren punturik sartu gabe- baina baskonistek ez zuten abantaila handitzen, tentsioagatik jaurtiketa oso eskasak egin baizituzten. Jaurtiketa libreetan ere oso lan txarra egin zuten gasteiztarrek, abantaila handiagotzeko aukera ezinhobea galdu baitzuten. Lehenengo laurdena 11-17 amaitu zen.

Errebote bakoitza guda txiki bat zen, portzentaje eskasak zirela-eta, bigarren aukerak saskiraketak erdiesteko ezinbesteko bihurtu baitziren.

Bigarren laurdenean Teletovicen debuta izan zen; debut eskasa, zoritxarrez. Bartzelonakoek, Ukici eta Navarrori esker, neurketa berdindu zuten, nahiz eta Planinicek erantzun beste aldean. Ukicek 20-19 aurreratu zituen etxekoak, arabarren eraso eskasei etekina aterata.

Prigioniren eta Scolaren falta gehiegi nabari zuen talde gasteiztarrak eta Dusko Ivanovicen taldeak ahultasun horren kontra bikain jokatzen zuen, kontraeraso bizkorren bidez. Tauk 2-3 zona defentsarekin erantzun zuen eta nolabait eusten zion memento txar horri. 0-4ko partzial baten ostean 26-27 aurreratu ziren arabarrak.

Atsedenaldira begira partidak ez zuen buruzagirik. Jaurtiketa libreei esker katalanek abantaila mantentzen zuten, baina eutsi egiten zioten gasteiztarrek. Ostiraleko neurketan ez bezala, partida oso astiro zihoan, faltak bata bestearen atzetik egiten baitzituzten talde biek. Joko nahasia eta tentsioa gainezka zela, atsedenaldira 34-33 iritsi ziren.

Lasaitasun falta

Aurtengo ACB Ligako finalerdiak jokalariengan lasaitasun falta nabaria erakusten ari dira. Bezperan Badalonan gertatu zen moduan, Bartzelonan ere minutu askotan, urduritasunak jota agertu ziren zenbait jokalari eta sekula ere huts egiten ez dituzten jokaldiak hutseginda eta erabaki txarrak hartuta.

Alde horretatik, burua hotz eta odola bero mantendu zituztenak nabarmendu ziren. Esate baterako, Tauko kanpoko jokalariak, Rakocevic eta Housek, bi hirukorekin abantaila eman bazioten beren taldeari: 38-43.

Jaurtitzaileek aurkitu zuten, azkenean, saskirako bidea. Navarro eta Lakovicen hirukoei House eta Rakocevicek erantzuten zieten, azken honek hiru jaurtiketa libre saskiratuz Ivanovici falta teknikoa adierazi ondoren.

Partidak norbati bihotzekoa eragin behar zion, ia ezinezkoa baizen abantailarik hartzea. Scolaren saskiratze bati Lakovicek erantzuten zion, baina argentinarraren errebote ondoko saski- ratze bikainari Prigionik defentsa bikainaz eta hirukoaz jarraipena eman zion. Lakovic zen Tauri erantzuteko gai zen bakarra: hirugarren laurdenaren amaieran 57-61 zegoen markagailua antolatzailearen hiruko ikaragarri baten «erruz».

Baskoniaren nortasuna

Zailena alde apur bat ateratzea zen eta eskuan zuen hori Maljkovicen taldeak. Behingoz, Baskoniak berea duen «nortasuna» agerian utzi zuen Palau Blaugranan irabazle izateko.

Lou Roek errebotean egindako lanak defntsa lana indartu zuen, Trias eta Marconatoren erreboterako sena neurri batean zapuztuta, baina puntuak ere behar zituzten. Lakovic eta Marconatori esker bertan jarri ziren katalanak: 64-65.

Markagailua oso estu zihoan, eta are estuago jarri zitzaion talde arabarrari Scolak bosgarren pertsonala egin ostean -nola sar diezaioke argentinarrak belauna Navarrori? Nola ez dute, bada, jokaldi horretan falta adieraziko?-. Hiru minuturen faltan Baskoniak 2-3 zona errepikatu zuen, baina Ukicek «bi gehi bat» handi bat sartuta, markagailua 69-68 ezarri zuen.

Prigionik Tau aurretik jarri zuen, 69-71 eta partida beldurraren eta eromenaren sasoian sartu zen. Splitterrek ere, bi jaurtiketa libre itzel sartu zituen: 69-73 azken minutuan.

Bartzelonakoek ez zuten urrutitik asmatzen eta, zorionez, Lou Roek erasoko errebote bat eta bi jaurtiketa libreri esker partida erabakita utzi zuen. Badaezpada ere, Prigionik azken baloi bat ohostu zuen. Bosgarren partidak erabakiko du dena. Asteartean denok Zurbaora!