Aritz Arginzoniz elorriar gaztea atxilotu zuen atzo eguerdian Estatu espainoleko Poliziak Santanderko autobus geltokian. Berri agentzia espainolek zabaldutako albisteen arabera, bizkaitarrak bere burua «ETAko kidetzat» jo zuen atxiloketaren mementoan. Horrekin batera, eta betiere polizia informazioaren arabera, Arginzonizi pistola bat eta tenporizadore bat atzeman zizkioten soinean zeraman bizkar-zorro baten barnean.

Horiek hala, informazio iturri beren arabera, gazte bizkaitarrak 2006ko abenduan Atxondo eta Zornotza inguruetan Ertzaintzak topatu zituen ETAren biltokiekin zerikusia dauka.

Orduan, Elorrioko bere etxea eta gurasoena arakatu zuen Polizia autonomikoak. Hala eta guztiz ere, ez zuten Arginzoniz atxilotu. Geroztik, gazte bizkaitarra atxilotzeko agindua zegoen. Alde horretatik, Garikoitz Etxeberria eta Asier Larrinaga Azkainen atxilotu zituen Estatu frantseseko Poliziak 2007ko urtarrilaren 9an, eta polizia operazio berarekin zerikusia ei zuten horiek.

Atzoko atxiloketaren ondoren, Polizia espainolak eta bertako poliziak Santanderko tren geltokiko hainbat gune inguratu eta bertan zegoen jendea aterarazi zuten. Horrekin batera, gutxi gorabehera 45 minutuan, Kantabriako hiriburuko autobus geltokia inguratu zuten poliziakideek.

Estatu espainoleko Barne Ministroaren ohar batek adierazi zuenez, Polizia espaniolak «terrorismoaren aurkako alerta bigarren maila gorenean» jarri du. Alde horretatik, Santanderren eta inguruan ETArekin ustezko zerikusia duten pertsona gehiagoren bila dabiltza. Horrekin batera, Polizia iturrien arabera, erakunde armatuak Kantabriako hiriburuan erabil dezakeen etxebizitza bat baden aztertzen ari dira.