Zailtasunak eta trabak handiak izaten jarraitzen duten arren, Euskal Selekzioa Turkian arituko da igandean Europako Kopako triatloi lasterketan. Nazioarte mailako proban Europako hainbat herrialdetako taldeek hartuko dute parte, eta tartean Zuriñe Rodriguez, Inma Rafael eta Itsaso Leuna atletek osatutako selekzioa arituko da lehiaketan.

ESAIT pozik azaldu zen atzoko prentsaurrekoan euskal selekzioak atzerrian aritzeko izango duen aukeraren aurrean, baina egoera hori oraindik ere iluna dela ohartarazi nahi izan zuen. «Pozgarria da Euskal Herriak nazioartean ordezkaritza izatea eta zoriondu egin nahi ditugu hiru triatleta hauek, baina zoritxarrez hau ez da maiz gertatzen. Gainera, tamalez, horrelako aukerak daudenean ez dute behar adinako babesik jasotzen», azaldu zuen atzoko agerraldian. Era berean, halako irteerak oso garrantzitsuak dira ESAITen ustetan, «askok erabiltzen dituzten gezurrak» agerian geratzen baitira, eta ofizialtasuna lortzea politikarien kontu hutsa dela arrazoitzen dituztenak kritikatu zituen. «Hainbat dira, bere burua zuritzearren, Euskal Herriak nazioartean ofizialki lehiatzeko derrigorrez Estatu izan behar duela aipatzen dutenak. Triatleta hauek erakutsi dute gogoarekin eta federazioen laguntza eta borondatearekin posible dela», arrazoitu zuen Euskal Selekzioaren Aldeko Iritzi Taldeak.

Euskal zirkuituko onenak

Euskal selekzioko hautatzaile Idurre Bilbao, bestalde, gogotsu azaldu zen zabalduriko ate berri horren aurrean eta Turkiara postu onak borrokatzeko xedearekin joango direla nabarmendu zuen. Horretarako, maila handiko taldea osatzea lortu du, izan ere, prestatzaileak azaldu bezala, euskal zirkuituko sailkapeneko lehen bi postuetako kirolariak arituko dira selekzioan. Itsaso da Inmaren aurretik zirkuitu horretan puntu gehien lortu dituen atleta, eta Zuriñe, berriz, Madrilgo goi errendimenduko zentroan aritu da aurtengo denboraldia prestatzen.

Hala ere, Idurre Bilbao hautatzaileak diru laguntza gutxi jasotzen dutela salatu zuen, beren itxaropena selekzio handiago bat osatzea baitzen Turkian jokatuko den Europako probarako, eta azkenean hiru kirolari baino ez baitira lehiatuko.

Hutsune handia utziko dute, bestetik, Llanos anaiek eta Virginia Berasategi kirolariek, azken hori ibilbide luzeagoko probatan lehiatzen baita, eta ez Europako probako kasuan egingo den distantzia olinpikoan.