MRA Navarra izango da aurten ere Ohorezko Mailan arituko den euskal talde bakarra, Excesa Bilbok ez baitzuen maila horretara igotzerik lortu. Irurtzungoak, ordea, aurten ere denboraldi ona egiteko asmoarekin abiatuko dira.

Denboraldi berria hastearekin batera, zaleak beti jokalari berriei begira egoten dira eta aurten lau izango dira aurpegi berriak. Horietan erakargarriena, edo ustez garrantzitsuena, Joel portugaldarra izango da. El Pozo Murcia taldetik dator 25 urteko jokalari hori eta hegalean edo pibot postuetan joka dezake. Itxaropen handiak dituzte beregan zuzendaritzako kideek, entrenatzaileek eta zaleek .

Bera ez da, ordea, Nafarroako hiriburura etorriko den jokalari berri bakarra. Robert madrildarra, Jaminho brasildarra eta Ruben segoviarra ere Imanol Arregi entrenatzailearen agindu- etara izango baitira.

Robert, Boadilla Las Rozas taldetik dator, 29 urte ditu eta hegalean jokatzen du. Jaiminho brasildarra, berriz, Playas de Salou taldetik dator eta oraindik 22 urte ditu. Etorkizun handiko jokalaria dela iragartzen dute, baina agian pazientzia izan beharko da berarekin. Atzealdeko hegalean jokatzen du. Azkenik, Ruben ekarri dute Caja Segoviatik. 23 urteko jokalari honek, hegalean, edo pibot postuan joka dezake.

Arnaldo eta Gomez

Berdeek hastear den denboraldi honetarako izango dituzten bajarik garrantzitsuenak Gomezena eta Arnaldorena izango dira. Lehenengoa Valentziara joan da, haiek ere amets egiteko moduko taldea egin baitute, eta kolorez aldatzeko garaia heldu zaiola erabaki du jokalari espainiarrak.

Arnaldoren hutsunea ere nabarmena izango da nafarren artean. Urte mordoa zeraman Imanol Arregiren aginduetara, eta zaleek ere asko maitatzen zuten jokalaria. Aurtengo denboraldian, ordea, Portugalen jokatuko du, Benfica taldearen koloreak defendatzen.

Iruñean arituko ez den bestea Paulinho portugaldarra da. Beregan itxaropen handiak jarrri zituen MRA taldeak, baina ez du lortu bere maila ematea eta utzita joan da Playas de Castellon taldera, ea han hasten den duena erakusten. Horiez gain, Ossorio, Usin eta Joseba ere ez dira arituko berdeekin.

Helburuei begira jarrita, berriz, MRA Navarraren asmoak bi izango dira GARAri Carmelo Villamarinek, taldeko prentsa buruak, esan zionez: «Hasteko, lehen itzulia estreinako zortzien artean amaitzea, horrek Kopa jokatzeko txartela emango baitigu. Gero, Liga amaieran ere estreinako zortzien artean izan nahi dugu, horrek Ligako azken fasea jokatzeko aukera emango digulako. Hortik aurrera, datorren guztia ongi etorria izango da. Aurrekontua ez daukagu handia, eta horiek lortzen baditugu, denboraldi ona izango da», esan zuen MRAko kideak.

Liga hasiera guztietan faboritoak zein diren aipatu behar izaten da eta garbi dago, betiko moduan, Interviu eta El Pozo Murcia izango direla. Azken urte hauetan talderik indartsuenak izan dira eta aurten ere tituluak irabazteko moduko taldeak egin dituzte. Dena dela, aurtengo denboraldirako beste talde bat ere gehitu zaie madrildarrei eta murtziarrei, Barcelonak ere onenen artean burua sartu nahi baitu.

Orain arte Barcelonak ez du areto futbolaren aldeko apusturik egin. Ez zuen diru gehiegi jartzen, eta Ohorezko Mailan doi-doi zebilen. Orain, ordea, diru sarrerak izateko beste iturri bat ikusi dute. Areto futboleko Ligan telebistak gogor sartu dira eta, futbolarekin eta saskibaloiarekin batera, Estatu espainolean gehien jarraitzen den Liga bihurtu da areto futbolekoa.

Hortaz, aurten diru asko gastatu dute, fitxatzeak ere asko eta onak egin dituzte eta, horiek beren emaitzak ematen badituzte, Intervirurekin eta El Pozorekin tituluen aldeko lehian aritu beharko dute. MRA, berriz, talde horiei sustoren bat ematen ahaleginduko da, lehenago ere emateko gaitasuna azaldu baitu.