Udazkeneko lehen eurite eta hosto erortzeekin batera, Biarrizko Latinoamerikako Zinema Jaialdia itzuli da aurten ere. Aste osoan, 100 filmetik gora izanen dira ikusgai Biarrizko Colisée, Royal edo Atalaya zinemagela eta aretoetan. Urtero bezala, Latinoamerikako kultura eta bizitzaren erakusgarri izan nahi du jaialdiak, eta protagonismoa obrek izanen dute izen handiek baino gehiago.

«Aurten, agian ez daukagu errealizadore edo aktore ezagunik , baina hamar film dauzkagu lehiaketan publikoak ezagutzea besterik eskatzen ez dutenak». Marc Bonduel jaialdiko zuzendariak argi utzi zuen Latinoamerikako Zinema Jaialdiaren norabidea. Izarrik ez da izanen beraz Biarritzen, baina orotariko zinema bai. Film luzeak, film laburrak, dokumentalak... denetarik izanen da aste osoan. Film estiloei dagokionez, kutsu sozialeko lanez gain, thriller-ak (Esto huele mal), polizia estilokoak (La noche de los inocentes) edo musika filmak (Ó Pai ó) izanen dira ikusgai.

Lehiaketa ofizialean hamar film luzek lehiatuko dute elkar. Baina, film luzeen lehiaketaz gain, beste hamar film labur eta hamazazpi dokumental egonen dira lehian. Benoit Jacquot zuzendaria izanen da film luze arloko epaiamahairen burua. Film laburren eta dokumentalen sailetako epiamahaien buruak, hurrenez hurren Roland Nguyen France 3 telebista kateko aduraduna, eta Stephane Millere errealizadorea izanen dira.

Aurten, Donostiako Zinemaldiarekin batera izango da Biarrizko jaialdia. Gainera, Biarritzen lehiatuko diren hiru film Donotiako Zinemaldirako aukeratuak izan dira: «Pena da biek filma berak proposatzea. Urte batzuetan Zinemaldiak Latinoamerikako zinema bazterrean utzi ondoren, badirudi interes gehiago erakusten diotela» erran zuen Bonduelek, bide batez, Guy Braucourt programazioaren arduradunaren lana txalotuz.

Azken horrek, alde onak ikusi zizkion egoerari: «Aste berean hain hurbil dauden bi jaialditan egonik, filma horietako egile, aktore eta gainerakoak errazago etorraraziko ditugu Euskal Herrira».

Zinema baino gehiago

Latinoamerikako Jaialdiak bide propioa egin nahi du gainerako zinema jaialdien aldean. Aurten ere, zinemaz gain hainbat ekimen proposatuko ditu. Lehiaketaz kanpo, noski, hamarnaka film ikusten ahalko dira aste osoan. Anitz, film luzeak izanen dira, eta Pedro Armendariz aktore mexikarra omentzeko parada eskainiko dute. Bost filmetan ikusten ahalko da Armendariz.

Horrez gain, Jorge Sanjines errealizadorearen lanen bitartez, Boliviako zinemaren atzera begirako erakusketa bat egingo da aste osoan zehar. Sanjinesen sei filma ikusten ahalko dira.

Film laburrei dagokienez, lehiaketatik kanpo, Argentinako ENERC eskolako ikasleen lanen bilduma berezi bat eskainiko da. Dokumentalen arloan, berriz, Arte telebista katearekin elkarlanean, azken honek ekoitzitako lanak ikusgai egonen dira.

Azkenik, aste osoan hainbat musika topaketa antolatuko dira Latinoamerikaren gaiaren inguruan. Biarrizko kasinoaren parean herrixka jarriko dute antolatzaileek, eta bertan emanen dira musika emanaldiak egun osoan. Programazioa, Biarrizko Atabalmusika aretoarekin eraikia izan da.

Astea borobiltzeko, Latinoamerikako idazleekin literatura topaketak, edo beraien lehen film luzea aurkeztuko duten errealizatzaile gazteen topaketa ere antolatuko dituzte Biarrizko Latinoamerikako Zinema Jaialdiko antolatzaileek.