Euskal Herrira itzuli da Juan Jose Ibarretxe Mexikotik bira ofiziala egin ondoren. Hain zuzen ere, Mexikon ezagutu du lehendakariak bilera politikoak egiteagatik Bilbon epaituko dutela Patxi Lopez eta Rodolfo Ares PSEko ordezkariekin eta Arnaldo Otegi, Pernando Barrena, Rufi Etxeberria, Juan Joxe Petrikorena eta Olatz Dañobeitia ezker abertzaleko kideekin. CNN telebista kateari emandako elkarrizketa batean zera esan zuen Ibarretxe berak epaiketa horretaz: «Tragikoa ez balitz, barre egitekoa litzateke, baina ez da barre egitekoa, tragikoa baizik».

Ezker abertzaletik azken egunetan nabarmendu denez, gertatutakoa Batasunaren aurka asmatu eta indarrean jarritako Alderdien Legearen ondorioa da. Uste bera agertu zuen atzo Ibarretxek CNNri emandako elkarrizketan: «Alderdien Legea tresna txarra da eta, gainera, orain, lege horren erabilera okerra ikusten ari gara».

Horiek horrela, alderdi «guztiekin» hitz egiten jarraitzeko asmoa duela berretsi du Lakuako gobernuburuak. CNNri esan dionez, «lehendakari gisa dudan funtzioa ez nuke beteko hori egingo ez banu».

Epaiketaren funtsari dagokionez, «erokeriatzat» hartu du Ibarretxek. Izan ere, nabarmendu duenez, «politika egiteagatik» baino ez dituzte epaituko.

Horrenbestez, «bakea bilatzeagatik eta akordio politikoak bilatzeagatik» presidente bat nola auzipetu dezaketen galdetu du Juan Jose Ibarretxek CNN telebista kateak zabalduko duen elkarrizketan.

Konstituzioaren bermea

Alderdi Politikoen Legearen aurka egin badu ere, bere ekinbidea Konstituzio espainolak bermatzen duela argudiatu du aldi berean lehendakariak. Bere hitzetan, «eskubide konstituzionala da hitz egitearena» eta horregatik ez du etsiko.

«Lehendakari batek herriaren alderdi eta sentsibilitate politiko guzti-guztiekin hitz egin behar du, eta Batasuna horietako bat da», gogora ekarri du Juan Jose Ibarretxek.

Etorkizunari begira, epaiketa egin egingo dela ziurtzat eman du Lakuako gobernuburuak, baina zigorrik ez dela izango espero duela ere argi utzi du. Hala ere, dagoeneko gertatu den guztia «oso serioa» dela nabarmendu nahi izan du.

EAko Antolakuntza idazkari Rafa Larreinak ere bere egin zituen atzo Ibarretxeren arrazoiak. Radio Nacional de España irratiak egin zion elkarrizketa batean hurrengoa adierazi zuen: «Hitz egitea ezin da inoiz delitu izan demokrazia batean».

Horrez gain, auziperatutako Batasuneko kide denek «eskubide zibilak aitortuta» zituztela gogoratu du EAko buruak. Hori dela eta, Larreinarentzat «ezinezkoa da zuzenbide ikuspuntu batetik auzipetuak zigortzea, are gehiago bilerak egitea delitu ez dela esaten duten Espainiako Entzutegi Gorenaren adierazpenak daudenean». Larreinak salatu duenez baina, «norbait argazki horren bila zebilen».