Aimar Irigoienek 13 aldiz berdindu zuen atzo bizkarraren gainean 175 kiloko zilindro kopa, eta marka berria ezarri zuen. Zaleek hamar jasoalditik hamabira bitartean eman baietz zioten, baina berak, atzo ere, lan bikaina egin, eta hamahiru aldiz jaso zuen.

Sekulako jendetza batu zen atzo Azpeitiko plazan errezildarraren marka saiakera ikusteko asmoarekin. Pasa den igandean ere errekor berria ezarri zuen 152 kiloko kubikoarekin. Atsedenerako tarte handirik ez zuen izan, baina urteari amaiera ezin hobea emateko, atzo ere marka latza ezarri zuen.

Aimarrek gogor ekin zion lanari. Erritmo bizi-biziarekin, eta garbi zegoen aurreikuspenetatik gertu zebilela. Hamargarren jasoaldia egin zuenean, hogei segundo geratzen zitzaizkion denbora amaitzeko, eta hamabigarrena berdindu zuenean, bederatzi geratzen zitzaizkiola, errezildarrak hamahirugarrena jasotzeari ekin zion, baita berdindu ere. Azkenean beste bi segundo sobratu zituen. Amaieran txalo zaparrada luzea entzun behar izan zuen, egindakoak merezi baitzuen.

«Hamar edo hamaika jasoaldi egiteko etorri naiz, baina oso gustura aritu naiz, eta azkenean hamahiru eman dizkiot», esan zuen errezildarrak. Orain atseden hartzeko astia izango du Irigoienek.

Atzokoarekin, Irigoienek urteari amaiera bikaina eman dio, izan ere, 2007. urtea oso ona izan baita beretzat. Euskal Herriko harri handien eta txikien txapelak lortu ditu, Gipuzkoakoa ere bai, baita Alegiako, Adunako eta Berrobioko torneoak ere. Gainera, beste lau marka berri ere ezarri ditu, eta guzti hori, 21 urte dituela. Egin duena eginda, lasai atseden hartzeko moduan dago, herrialde honetako urteko kirolaririk onenetakoa izan da-eta.