Altsasuko Gure Etxea kulturgunean «Atxik!» izeneko hausnarketa prozesua aurkeztu zuten atzo. Hain zuzen ere, ekimen hori euskal kirolen etorkizun «osasuntsua» ziurtatzeko helburuarekin jarri dute abian, joko asko desagertzeko bidean daudela ikusten baitute.

Horren aurrean, zer edo zer egin beharra zutela azaldu zuen Juan Carlos Etxeberriak, gogoeta horren bultzatzaileetariko batek. «Euskal jokoek eta kirolek gero eta tarte gutxiago dute, ikuspegi folklorista are eta nabarmenagoa da, eta parte hartzea gero eta murritzagoa. Hala izanda, desagertzeko bidean daudela ikusita, zer edo zer egin behar genuelako, abian jarri dugu prozesu hau», esan zuen.

Komunikabideek profesional edo elite mailako kirolei soilik jartzen diotela arreta azpimarratu zuen, herri kiroletan beste hainbat arlo egon arren. «Horrek errealitatea desitxuratzen du, elite mailako kirolariak herri kiroletan dabiltzanen gutxiengoa baitira. Pilotaren adibidea jarriko dut. Profesionalen eta gizonen esku-huskari soilik egiten zaio tartea, beste hamabost modalitate badaude ere. Arraunarekin eta aizkorarekin gauza bera gertatzen da», adierazi zuen Etxeberriak.

Herri kiroletako eragile guztiei hausnarketa prozesuan parte hartzeko gonbita egin zien ondoren. «Eragile, begirale, kirolari, zale eta interesa duen orori egiten diogu dei. Prozesu ireki bat da honako hau, eta guztiok lekua izango dugu, prozesu parte-hartzailea baita. Ziur gaude gauza mordoa dugula elkarrekin partekatzeko. Gu guztion ideia, ikuspegi, izaera, bizipen, egoera, aberastasun iturri izatea nahi dugu», erantsi zuen.

Etxeberriak aurreratu zuenez, hausnarketa prozesuak urtebete iraungo du. Gogoetak bost urrats edo aldi izango ditu. Lehenik eta behin, atzotik hasita, talde eragilea osatzea izango dute helburu. Bigarrenik, maiatza hasieran, oinarrizko txosten bat idatzia izatea espero dute. Hirugarrenik, maiatza eta ekaina bitartean, ekarpenak egiteko aukera emango dute, epe bat jarrita. Laugarrenik, irailean, urrian eta azaroan -uda partean arnasa hartuko dute-, eztabaida piztuko dute. Eta bosgarrenik, abendu inguruan, jasotako guztia txosten batean bilduko dute.

Behin txostena osatuta, «Atxik!» ekimenak bere lana bukatutzat emango duela azaldu zuen. Izan ere, eragileei egokituko zaie txanda gero, ondorioak bere egin, eta etorkizun «osasuntsua» ziurtatzeko zein urrats hartu behar diren planifikatzeko ordua izango baita.

Euskal joko eta kirolen inguruko planteamendu hori Euskal Herri osora zabaldu nahi dutela nabarmendu zuen Etxeberriak, baita gogoeta «kolektiboa» izan behar duela argitu ere.